في كل شلة.. هتلاقي الشخصية دي (مقال)
كتبت_ندى عثمان
كل واحد ليه مجموعة من الصحاب أو«شلة» مكونه من مجموعة شخصيات، واكيد في كل شلة نوع أو نوعين من أنواع الصحاب ديه، بس في الأخر مش هتقدر تبعد عن صحابك لان بكل ما فيهم من عيوب أنت بتحبهم.
1-الاكل أسلوب حياة:
مفيش حد فينا معندوش صاحب بيحب الاكل أكتر من عينه، وخروجاتكم كلها عبارة عن مطاعم وكافيهات عشان هو ديما جعان، وحتى اذا شبعان فمفيش مانع انه يحلي.
وطبعاً لازم يكون شكله بيعبر عن شخصيته، هتلاقي جسمه مش بيبان عليه، وفلوسه كلها مصروفه على الأكل فبالتالي مش هتلاقي عنده هدوم كتير، ومتفكرش تقترح عليه أنه يروح الجيم، لان فلوس الجيم الأكل أولى بيها.
كنت جالسة مع أصحابي، واذا بشخص يقترح الخروج ولكن هيخرج معانا «أكيل الشلة»، ديه شهرته ما بينا، ولكن أحد الجالسين قال:«لا، ده لو خرج هنصرف فلوسنا كلها على الأكل ومش هنعرف نستمتع ولا هنعرف نشبع، هو متعة الوحيدة الأكل لما نتفق نتغداء مع بعض نبقى نكلمه».
2-الفيلسوف:
ده بقى شخص عارف اللي الناس كلها متعرفوش، هتلاقيه بيكلمك ديما عن أحوال البلد واللي فيها، وبيحسسك أنه عارف اسرار الدولة كعضو من أعضاء المخابرات السرية، وكمان أنت متعرفش حاجة وهو عارف كل حاجة.
أول ما تشوفه هتعرفه عادة بيلبس نضارة، وبيشرب سجاير كمحاولة منه أنه ينسى هموم العالم اللي فوق دماغه، وهدومه ديما مكرمشه لانه مفيش وقت يكويها أو يبعتها «الدراي كلين».
3-عينه بارده:
غضب عنك هتلاقي نفسك بتخبي عليه أي حاجة تحصلك في يومك، لانك عارف لو قولتها هتزول، في اعتقاده أن ده صدف، متفكرش في يوم أنك تصارحه عشان هيزعل.
في يوم كان عندي مراجعة نهائية للمادة الفيزياء في أيام ثانوي، واقفه في الشمس مستنين الأستاذ، صاحبتي اسمها علا«ايه ده عينك حلوة في الشمس»، في الدرس القلم دخل في عيني من غير قصد والنتيجة قرحة في شبكة العين، وروحت الامتحان بعين واحدة.
4-قدوته الخليل كوميدي:
الشخص ده دمه خفيف بطريقة غبية، المصيبة أنه فاكر أن دمه خفيف فعلاً، اذا كنت مرتبط حاول أنه ميقعدش مع شريكك، لانه ممكن يكون سبب انفصالكم، وطبعاً مواقفه كتير لأنه مبيطلش خفة دم.
5-الخلوق:
انت بتتكسف تقعد معاه في مكان عام لان نص كلامه شتايم، فمقابلتك معاه هتبقى في مكان مغلق زي بيتك أو بيته مثلاً، وصوته عالي ديما، ده من الأفضل انك تبعد عنه لانه هيسوء سمعتك، ويبوظ أخلاقه.
6-عندما يجتمع الجمال والشياكة:
عنده قبول عند الناس كلها، وبيسرق منك جو الشهرة ولفت الأنظار، لبسه كله بيبقى ماركات خصوصا لو بنت متفكرش تنزل تشتري معاها هدوم لانها هتلف الكرة الأرضية كلها وممكن ميعجبهاش حاجة في الأخر.
7- الحياة لونها بامبي:
ده بقى شايف الدنيا سواد في سواد، لو حبيت تعرض عليه فكرة أنكم تنزلوا تاخدوا كورس مثلاً، هتلاقي احباط وكسل غير طبيعي، ديما بيندب حظه والظروف، وبوستاته على الفيس تكرهك في نفسك، أحسن معروف ممكن تقدمه أنك تبعد عنه لان ده هيبقى سبب من أسباب انتحارك أو انك تهاجر من البلد.
