رئيس التحرير أحمد متولي
 للولاد.. 5 نصائح عشان متخسرش صديقاتك

للولاد.. 5 نصائح عشان متخسرش صديقاتك

من أكثر العلاقات اللي بنلاقي حواليها كلام كتير هي العلاقة بين الولاد والبنات، ودائمًا في شد وجذب بين الطرفين سواءً كانوا أصحاب أو مرتبطين، يمكن علشان ثقافة التعامل بينهم مكنتش موجودة قبل كده.

بس بما إنها قدرت تفرض نفسها على الواقع، فكان لازم «شبابيك» يقدملك 5 نصائح تعملها علشان متخسرش صديقتك.

الصراحة

سواء كنت في شغلك أو جامعتك لازم تعرف إنك أكيد هتتعامل مع بنات، وبما إن أغلب الشباب بيستصعب العلاقات دي حتى لو كانت صداقة أو زمالة، أحب أقولك إن احيانًا المشكلة بتبقى عندك أنت لإن كلامك بالنسبة ليها مبيكونش واضح.

علشان كده لازم تقول لنفسك قبل ما تدخل أي علاقة حتى لو كانت صداقة إن الصراحة في الكلام والتصرفات هي الضامن الوحيد لعلاقة صح مش هتخليك تخسر الشخصية دي.

حط حدود في تعاملاتك

معظمنا بيشوف إن النقطة دي مفيدة أكتر بالنسبة للبنت، بس في الحقيقة هي مهمة في الناحيتين؛ لإن الحدود اللي أنت هتحطها دي مش بس هتفيدها هي بأنك متتدخلش في حاجة متخصكش.

لا ده هتمنع عنك أنت كمان «عمايل التهيؤات»، ودي بقي أهم نقطة لإن طول ما أنت مش حاطط حدود هتفتكر إنها حد مهم أوي عندك وممكن ده يوصلها هي لمشاعر ناحيتك هي أصلًا مش موجودة عندك.

فرق بينها وبين حبيبتك

مش لازم علشان علاقتكو مقربة إنك تتعامل معاها بـ «يا حبيبتي»، و«حشتيني»، و«بيبي»؛ لإن ده هيضرك أنت لو مشاعرها اتطورت ناحيتك غصب عنها بسبب كلامك.

بلاش تخسرها بكلامك اللي دائمًا بيحمل أكتر من معنى، يعني مثلًا لو مكنتش مرتبط ليه تقولها كلام ميتقالش لصديقة، ليه تعشمها وأنت بينك وبين نفسك بتتعامل عادي.

حافظ على شكلها

مش معنى إنكو أصحاب قريبين إنك تهين كرامتها قدام الناس سواءً في الشغل أو بين باقي أصدقائكم، لازم تعرف إن الأصحاب بيعرفوا إزاي يهونوا على بعض مشاكلهم مش هما اللي بيزودوها.

احترم مساحتها الشخصية

مهم جدًا إنك تعرف متى هتكون عاوزاك في حياتها ومتى هتكون عاوزه مساحة حرية ليها هي بس من غير وجودك فيها.

لازم تحترم النقطة دي لإن المساحة دي هتكون ليكو إنتو الاتنين، وطول ما هي شايفة إنك مريح في التعامل وبتعرف متى تتعامل ومتى تسيبها حرة، الخطوة دي هتضمنلك فترة أطول في علاقتكو ببعض. 881 882 883 884

سوزان حسني

سوزان حسني

صحفية مهتمة بالكتابة في مجال العلاقات