7 قنوات تعليمية على «يوتيوب» متعرفش عنهم حاجة
أوقات كتير بتبقى علاقتنا مع «يوتيوب» قايمة في الأساس على الأغاني والأفلام، رغم إن الموقع بيقدملنا كنوز منعرفش عنها حاجة.
وبالتالي بدل ما تعتمد على صفحات التواصل الاجتماعي في إنها ترشحلك قنوات تعليمية في مجالات معينة، اعرف أنت الطريق وانطلق فيه براحتك مع تقرير «شبابيك» عن أهم 7 قنوات تعليمية على «يوتيوب».
Veritasium- 1
بتحب الفيزياء والكيمياء والنظريات العلمية، بس عندك مشكلة في صعوبة في فهم المواد، القناة دي هتخليك تستمتع بيهم من خلال فيديو علمي كل أسبوع بيعتمد في أسلوب العرض على المنهج البسيط.
Vsauce- 2
القناة دي مشهورة بالمواضيع العلمية والشبابية اللي بتقدمها على «يوتيوب» لأنها بتعتمد في أسلوب تقديم المواضيع على التبسيط، وقدرت إنها تجذب ملايين المشاهدين وخصوصًا المهتمين منهم بأسرار الرياضيات. اقرأ أيضًا⇐إزاي تقفش كورس «أون لاين» بالعربي
CGP Gray- 3
أما CGP Gray فبتعتمد في موضوعاتها على التنوع يعني هتلاقي فيها حاجات كتير من أول قوانين حقوق النشر لحد الفضاء وعلوم الفلك. وطريقة عرضها للموضوعات بتعتمد على «الأنيميشن».
MinutePhysics- 4
أغلب فيديوهات القناة بتهتم بمجال الفيزياء والنظريات العلمية عمومًا، ومن أهم المميزات اللي فيها إن المقطع الواحد مبيزدش عن 3 دقايق. اقرأ أيضًا⇐إزاي تعمل فيلم كرتون بنفسك؟
وفي أسلوب العرض بتعتمد على الرسوم اليدوية السريعة اللي بتسهل استيعاب الفكرة بشكل أوضح وأسهل.
Smarter EveryDay- 5
من اسم القناة هتلاقي إن صناعها كانوا مهتمين بجعل المُشاهد أذكى كل يوم من خلال تعليمه شيء جديد بطريقة شيقة سواءً كانت في «علم الحيوان»، أو«الفيزياء»، أو أي مجال آخر.
6– Sci show
هنا بقى هتلاقي أجوبة لكل الأسئلة اللي بتدور في بالك عن أي حاجة بتخص العلم. القناة دي بتبسط لنا الحياة اليومية وبتعرفنا المغزى من بعض الحاجات اللي بتحصل كل يوم قدامنا من غير ما نعرف هي اتعملت إزاي أو الهدف من وراها.
7– Crach Course
لو عاوز كورسات مجانية في مجالات علمية مختلفة، فالقناة دي هتوفرلك الفرصة سواءً في «التشريح»، أو«وظائف الأعضاء»، أو«الكيمياء»، أو«علم النفس»، أو «التاريخ».. إلخ.
ومن أهم مزايا القناة أنها تفتح أمامك المجال لتتعلم أكثر من تخصص عن طريق فيديوهات شيقة.
