رئيس التحرير أحمد متولي
 اشرب عشان تنسى.. مشروبات منعشة في الحر

اشرب عشان تنسى.. مشروبات منعشة في الحر

بما إن الصيف نار يا حبيبي نار :D قررنا في الموضوع ده نقولك على المشروبات والأكل المفيد ليك في الصيف واللي في نفس الوقت ينعشك وينسيك الحر.

المية

طبعًا المية منقدرش نستغنى عنها وفي الصيف بالأخص هي الأساس فلازم تشرب كمية مناسبة منها لأنها بتعوضك عن المية اللي بتفقدها نتيجة العرق وكمان بتنظم درجة حرارة جسمك وبالتالي بيبقى فيه توازن بين درجة حرارتك و الجو.

وكمان بتساعد على التخسيس لأنك لما بتشربها قبل الأكل بتملى معدتك وبالتالي بتخلي شهيتك مش مفتوحة وبرده لما تشرب مية بدل المشروبات الغازية هتحمي نفسك من السعرات الحرارية اللي هتخن جسمك.

في دراسة اتعملت من 6 سنين في أمريكا بتقول إن اللي بيشربو أكتر من 5 كوبايات مية كل يوم ده بيقلل احتمال إصابتهم بالأزمة القلبية بنسبة 41% مقارنة بالناس اللي بيشربوا أقل من كوبيتين مية كل يوم.

العصاير

عصير

العصاير الفريش هتكون منعشة ليك في الصيف وممكن بدل ما تشتري من برا تعمل أنت عصاير ليك في البيت وتحطها في التلاجة وتبقى في متناول ايدك لما تعوزها زي عصير البرتقان والموز والفراولة والجوافة والمانجة.

وكمان تقدر تتحكم في السكر اللي عايز تحطه عليهم وبكدة هتحافظ على إنك تشرب العصاير اللي بتحبها من غير ما تزود ليك وزنك. وعندك عصاير تانية طبعًا ليها فوايد عظيمة.

قد يهمك أيضا⇐في البيت والشارع والشغل.. إزاي تتغلب على الحر؟

القصب

القصب من المشروبات اللي فيها كمية كبيرة من المعادن زي الكالسيوم والبوتاسيوم والمغنيسيوم والحديد والمنجنيز، المعادن دي بتحفظ توازن السوائل جوا الجسم وبتقلل شعورك بالجفاف لما درجة حرارة الجو تكون مرتفعة. وبتغسل الكليتين بشكل طبيعي ومش بيخليك حاسس بعطش.

الليمون بالنعناع

الليمون من المشروبات اللي بتمنع العطش في فترة الصيف وبتنظم عملية الهضم وبتخلص الجسم من السموم والنعناع لما بيكون معاه بيعمل حالة من الانتعاش J.

البطيخ

5427691534_d2eeab1207_o

البطيخ غني بفيتامين A وC وكمان العنصر الأساسي في تكوينه هو المية وده قد إيه بيخلي البطيخ منعش ولذيذ وصحي في نفس ذات الوقت.

كمان أكل البطيخ له فوايد كتيرة جدًا منها إنه مثلًا لو أكلته بمعدل كويس هيساعد في تخسيس الوزن لأن كل 100 جرام منه بتدي 30 سعر حراري.

وكمان لو أكلته بشكل معتدل هينظملك مستوى سكر الدم وكمان الفيتامينات اللي موجودة في البطيخ بتكافح سرطانات كتيرة زي سرطان الثدي والبروستات والرحم والرئة والقولون.

قد يهمك أيضا⇐ للطلاب.. 8 نصائح للتغلب على الحر أثناء «المذاكرة»

الأناناس

من المشروبات المنعشة في الصيف لأن طعمه لذيذ وبيخلص الواحد من العطش والتعب وكمان ليه فوايد صحية منها إنه بيدي الجسم نشاط وحيوية وبينقص الوزن الزايد وبيعالج الإمساك وبيساعد على خفض ضغط الدم المرتفع.

العرقسوس

من المشروبات الرمضانية اللي محببة عند ناس كتير وكمان من المشروبات اللي قادرة إنها تخفض درجة حرارة الجسم وتمنع الشعور بالعطش لمدة طويلة.

المصادر: 1 ،  2 ، 3  

ملكش نفس

لبسك

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»