إيه هو الاتحاد الأوروبي؟ وبيعمل إيه؟
الاتحاد الأوروبي حاجة زي جمعية فيها دول كتير - 28 دولة - اتأسست عام 1992 بعد معاهدة «ماسترخت» اللي اتوقعت في هولندا 1991. بحيث تكون كل الدول بتتصرف زي دولة واحدة وهو يضمن ليها قوة كبيرة بالتوحد بينهم.
أهدافه
الاتحاد الأوروبي اتعمل عشان الحاجات دي:
- مواطنين الدول اللي في الاتحاد تعيش في سلام وازدهار وحرية. يعني "المواطنة الأوروبية".
- ضمان الأمن والعدل بين الدول والتعاون في الشؤون الداخلية.
- دعم التقدم الاقتصادي والاجتماعي عن طريق (السوق المشتركة، العملة المشتركة اليورو، التنمية الاقليمية، قضايا حماية البيئية).
- وكمان تقوية دور أوروبا في العالم عن طريق سياسة خارجية وأمنية موحدة. "الاتحاد الأوروبي والعالم".
هل هي فكرة جديدة؟
لأ.. من زمان ودول أوروبا حاولت توحد من بداية القرن الـ19 لكن كل المحاولات فشلت.. على سبيل المثال:
- نابليون حاول في القرن التاسع عشر، تجميع دول أوروبا تحت مملكة واحدة، لكن الطبيعة العسكرية للمحاولة أفشلتها لأن الدول الأوروبية مكنتش على وفاق ساعتها، وكانت شايفة إن دا إخضاع بالقوة العسكرية.
- وكان فيه محاولة تانية في الأربعينيات على إيد "هتلر" لكن فشلت لنفس السبب. كانت محاولة عسكرية لإخضاع الدول.
- آخر محاولة كانت عام 1951 وكانت لغرض اقتصادي تحت اسم "الجماعة الأوروبية للفحم والصلب" وكان فيها 6 دول بس، وجه بعدها "المؤسسة الاقتصادية الأوروبية". واتأسست عام 1957، وهي كانت الشكل الأقرب للإتحاد الأوروبي الحالي.
الوحيد اللي كان نفسه في اتحاد أوروبي بس بشكله الحالي عام 1850 كان المفكر "فيكتور هوجو". دعا لدول تحت مظلة واحدة هدفها رخاء المواطنين والدفاع عنهم ليس إلا.. بس محاولته مالقتش صدى كبير. ويعتبر الاتحاد الأوروبي بشكله الحالي هو الأقرب للشكل اللي كان عاوزه.
في 7 أسئلة.. نلخص لك قصة انفصال بريطانيا عن الاتحاد الاوروبي
تبيان المجتماعات الأوروبية
من الحادت المميزة في الاتحاد الأوروبي بردو، إنه قدر يجمع كل العدد دا من الدول "28 دولة" وكلهم بيتكلموا لغات مختلفة وليهم ثقافات مختلفة. بس في النهاية اتجمعوا تحت إدارة واحدة.
يعني عدد لغاتهم الرسمية 24 لغة. عدد سكانهم 508,191,116، ومساحته 4,493,712 كيلو متر مربع. وعملتهم المواحدة هي اليورو. باستثناء بريطانيا اللي خرجت مؤخرا وكان عملتها الجنيه الاسترليني.
بعد الانفصال عن الاتحاد الأوروبي.. هل «تتفكك» بريطانيا؟
ليه عملتهم موحدة "اليورو"؟
- العملة الموحدة بتخلق سوق مالي أوروبي مبني على أسس اقتصادية موحدة، ودا بيديها قوة.
- عشان العملة الأوروبية يكون ليها وزن قصاد عملات العالم التانية.
- عشان ميكونش فيه سلبيات ومخاطر لتقلبات أسعار الصرف بين عملات الدول الأعضاء بالاتحاد؛ لأن التقلبات دي هتأثر على أداء الشركات المنطوية تحت الاتحاد.
- عشان كمان يكون فيه شفافية في الأسعار والتكاليف، وزيادة المنافسة، ورفع معدلات النمو الاقتصادي في الدول الأعضاء.
إزاي بيتم إدارة الاتحاد وكل الدول دي موجودة فيه؟
الاتحاد الأوروبي مش بيدار عن طريق حكومات دول، إنما عن طريق مؤسسات يعني باختصار هو نظام مؤسسي، زي شركة كبيرة كدة
ومن المؤسسات التابعة ليه:
البرلمان الأوروبي: بيتم انتخابه كل 5 سنين من شعوب الاتحاد الاوروبي.
مجلس الاتحاد: هو جهة اتخاذ القرار في الاتحاد الاوروبي، وبيشارك البرلمان الاوروبي مسؤولية إصدار قوانين الاتحاد الاوروبي. وبيتكون من وزراء من حكومات الدول الأعضاء.
المفوضية الأوروبية: هي جهة تنفيذية للاتحاد، يعني مسؤليتها متابعة تنفيذ القوانين والقرارات الصادرة منه.
محكمة العدل الأوروبية: وبتشرف على تنفيذ القوانين.
محكمة مراقبة الحسابات "ديوان المحاسبة": وبتشرف على ميزانية الاتحاد.
الهيئات الإدارية للاتحاد
اللجنة الإقتصادية والإجتماعية الأوروبية: فيها مؤسسات المجتمع المدني في القضايا الاقتصادية والاجتماعية.
هيئة المناطق: بتمثل الإدارات المحلية في السياسة الاقليمية والبيئية والتعليم.
المحقق الأوروبي: بتشرف على شكاوى المواطنين المتعلقة بسوء الإدارة بمؤسسات الإتحاد الأوروبي.
مصرف الاستثمار الأوروبي: بيساهم في أهداف الاتحاد الأوروبي يعني تمويل الاستثمارات الطويلة الأجل العامة والخاصة.
المصرف المركزي الأوروبي: يشرف عن السياسة النقدية والتبادل النقدي.
أزمات اتصرف فيها الاتحاد بفاعلية؟
الأزمة الاقتصادية في 2008، كان من تبعاتها أزمة اليونان الاقتصادية، اللي هي واحدة من الدول الاعضاء في الاتحاد الأوروبي وكذلك في منطقة اليورو، عشان كده توالت المساعدات في دول الاتحاد وبخاصة ألمانيا اللي بتعتبر الآن أقوي الدول الأوروبية اقتصاديا وأغناها، وكل ده عشان المحافظة على تماسك الاتحاد وعلى قوة عملة اليورو.
مميزات إنك تكون مواطن في دولة تابعة للإتحاد الأوروبي:
- مش بتحتاج لتأشيرة دخول لأي دولة من الدول الأعضاء.
- ليك الحق في انك تشتغل وتدير مشارع في أي دولة من دول الاتحاد
- لو أهلك في دولة مش تابعة للإتحاد الأوروبي ممكن تجيبهم يقعدوا معاك ، حاجة زي "لم شمل العائلة".
- باختصار انت بتتعامل في أي دولة للإتحاد الأوروبي كأنك في دولتك بالظبط.. بس شرطة تكون دولتك تابعة للإتحاد.
