رئيس التحرير أحمد متولي
 جبت مجموع وحش؟.. دي رسايل بعتهالك نجوم مع «شبابيك»

جبت مجموع وحش؟.. دي رسايل بعتهالك نجوم مع «شبابيك»

جبت مجموع وحش في الثانوية العامة وحاسس إن خلاص ديه نهاية الدنيا.. روق بقى كدة لأن فيه نجوم بتحبها كلمناهم عشان يقولو ليك شوية حاجات لازم تاخد بالك منها عشان حياتك متقفش بسبب نتيجة الثانوية العامة.

الضربة اللي متموتش تقوي

زيزي مصطفى والدة الفنانة منة شلبي

الفنانة زيزي مصطفى، والدة النجمة منة شلبي، بتقول إن «الضربة اللي متموتكش تقويك، ولازم يكون عندك أمل في ربنا، ولو رجعت للتاريخ هتلاقي كتير من الناس البارزة في المجتمع جابو مجاميع قليلة في الثانوية يعني المجموع مش مقياس تقيس بيه إذا كنت ناجح ولا لأ».

«ولازم يكون عندك إرادة وطموح في إنك هتوصل للي عايزه وتدور على الكلية اللي متوافقة مع مجموعك وتحاول تحبها وتستفيد منها عشان هى تحبك وتقدر تفيدك لأنك لو كنت نافر منها مش هتعرف تكمل».

والدها يواجه المؤبد.. قصة الأولى على الثانوية التي لم يهنئها الوزير

الاجتهاد

أما محمد فراج، أحد أبطال مسلسل «تحت السيطرة» رمضان 2015، و«الميزان» رمضان 2016، فبيقولك إنها «فترة وهتعدي، ولازم في حياتك الجامعية تحاول تحب اللي بتذاكروا وتجتهد على قد ما تقدر عشان اللي معرفتش تحققوا في دراستك الثانوية تحققوا في دراستك الجامعية وتوصل للتقدير اللي كنت بتحلم بيه».

مش أخر الدنيا 

أما النجم محمد الشرنوبي فبيقولك إن «دي مش نهاية الدنيا، وفيه حاجات ممكن تكون ناجح فيها تانية ولو السنة ديه متوفقتش فيه حاجات أكيد هتتوفق فيها».

وكمان «عليك إنك تحدد هدفك زي ما الشرنوبي كان محدد هدفه من زمان إنه هيدخل معهد التمثيل وركز فيه ونجح وبقى نجم من النجوم الشباب  اللي ليهم كاريزما تمثيلية مختلفة ظهرت في عدة أعمال أخرها تجسيده لشخصية عباس في مسلسل أفراح القبة».

الحياة المهنية غير الدراسة

أما النجمة نهى عابدين، اللي تميزت في تجسيد دور «دنيا» في مسلسل «ونوس» رمضان 2016، حكت لينا تجربتها مع الثانوية العامة وقالت «كان نفسي ادخل اقتصاد وعلوم سياسية، أو إعلام، لكن جبت في الثانوية العامة حاجة و70% وزعلت جدًا وقتها إني مش هقدر ادخل الكلية اللي كان نفسي فيها».

وأضافت «بس اكتشفت إن فيه دكاترة ومهندسين مشتغلوش بدراستهم وامتهنوا مهن تانية وذكرت لينا النجم يحيى الفخراني على سبيل المثال إنه خريج كلية الطب وامتهن التمثيل وشافت إنها كان ممكن متحققش اللي هى عايزاه لو دخلت الكلية زي ما هى محققة دلوقتي».

وأكد نهى أن «الحياة المهنية غير الدراسة، وعشان كده بص على مجموعك إنه مش أخر الدنيا و وارد إن ربنا يكون عايز يديك أكتر من اللي انت بتحلم بيه».

رمضان صبحي.. ناجح في الثانوية بـ60%

 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»