رئيس التحرير أحمد متولي
 التأخير على الشغل مشكلة ليها حل.. اظبط نفسك

التأخير على الشغل مشكلة ليها حل.. اظبط نفسك

التأخير على الشغل مشكلة بتواجه معظمنا وعشان نتغلب عليها ونروح في الميعاد المظبوط هنقولك في الموضوع ده تعمل إيه :)

ليه بنتأخر

الكاتب والباحث في العلوم الإنسانية كريم الشاذلي بيقول إن السبب في ده راجع لحاجتين ثقافة المجتمع وانتظار الدقيقة الأخيرة.

  • ثقافة المجتمع

بمعنى إن الشخص المتأخر بيشوف إن فيه ناس كتير بتتأخر على أشغالها زيه فبالتالي بقى يشوف إن ده سلوك عادي في المجتمع لأن كل اللي حواليه بيغذوا فيه الإحساس ده فمبقاش حاسس إنه نشاذ عن اللي حواليه.

والشخص ده لما بيسافر برا ويلاقي إن كل المجتمع منضبط بياخد وقت على بال ما ينضبط لأن برا الدقيقة بيكون ليها أهمية عكس المجتمع هنا اللي معظم الناس فيه بتتأخر.

عشان تصحى بدري.. 5 خطوات تساعدك

  • الدقيقة الأخيرة

الشخص المتأخر بيستنى لغاية الدقيقة الأخيرة اللي مفروض أصلًا يكون فيها قاعد على المكتب في شغله وده لأنه أخر نفسه بالحاجات دي.

  • لسة بدري

لو شغله الساعة 9 بيظبط المنبه على 7 ولما يرن يقول لسة بدري ويظبطه على 8 ولما يرن يقول لسة بدري برضه ولما يظبطه على 8 وربع يصحى بقى وده سيناريو بسيط للي بيحصل.

وسبب ده طبعًا إنه ماخدش كفايته من النوم اللي مفروض عدد ساعاته متقلش عن 8 ساعات وده لأنه كان سهران لغاية الفجر.

  • هلبس إيه 

ولما بيصحى بيبدأ يدور هيلبس إيه، ولو فيه حاجة مش مكوية بيقف يكويها وسبب ده برضه إنه مفكرش يحضر لبسه من بالليل.

  • وقت الماكياج

وكمان البنت بتاخد وقت تحط الماكياج بتاعها، وطبعًا ظبطت الأيلاينر لوحدها ممكن تاخد في ايديها ربع ساعة أو أزيد :)

للبنات.. 6 نصائح هتودعي بيها التأخير الصباحي

  • السوشيال ميديا

وكمان تلاقيه بيدخل على «تويتر» أو «فيس بوك» ويشوف مين عمله لايك وكومنت ويرد عليه. والوقت بيجري وهو مش حاسس إنه متأخر.

ولما يروح الشغل يبتدي يقول مبررات اللي لو مديره صدقها مرة مش هيصدقها التانية. صحيح في ناس مننا بتتعرض لمواقف طارئة بتخليها تتأخر على الشغل، وبيكون ليها مبرراتها المقنعة اللي بتبان في صدق كلامها بس ده مفروض يكون كل فين وفين مش كل يوم لأنه لو كل يوم اتأخر هيسيب انطباع غير جيد عند رئيسه في الشغل.

الحل

الباحث في العلوم الإنسانية كريم الشاذلي بيقول إنك لازم تدرك إن ممكن تحصلك مشاكل كتيرة بسبب تأخيرك في الشغل زي إنك ممكن تترفد أو إن يكون عندك انترفيو وتوصلوا متأخر وتروح عليك الوظيفة وغيرها من المشاكل اللي لازم تدركها كويس عشان تروح شغلك في الميعاد المحدد.

  • التعامل مع المشكلة

لازم كمان تحط رؤية ليك في التعامل مع مشكلة التأخير وتنسى خالص المبررات اللي كنت بتقولها وتبدأ تعود نفسك على إنك تنام بدري عشان تعرف تصحى فايق وفيه، مجموعة تطبيقات هتخليك تصحى بالعافية J تقدر تحملها من هنا.

وكمان تجهز لبسك وتكويه من بالليل. وتحطي مكياج بسيط الصبح مياخدش منك وقت ومتشوفش الفيس بوك لأنه هيضيع وقتك، وكمان تحط لنفسك وقت محدد تخلص فيه كل اللي عايز تعمله.

يعني لو صحيت 8 وشغلك 10 اعمل حسابك تخلص حاجتك في نص ساعة مثلًا بحيث تنزل من بيتك على 9 وتروح شغلك رايق وتعمل النسكافيه بتاعك J ولما تتعود على إنك تعمل الحاجات دي هتصحى بدري وهتلاقي عادة التأخير واحدة واحدة مبقتش موجودة.

  • العقاب والمكافأة النفسية

اتعامل زي العيل الصغير، عاقب نفسك لو اتأخرت لأن التأخير زي ما قولنا هيسبب ليك مشاكل. وكافيء نفسك لو روحت الشغل بدري وحط في بالك إن مرواحك بدري هيخلي مديرك يحس إنك بقيت تلتزم.

وده هيخليه يفكر إنه يحطك في قايمة الناس اللي بيفكر يرقيهم لأن ممكن كانت ترقيتك متوقفة على إنك تلتزم في مواعيد شغلك ومتتأخرش.

للاستيقاظ مبكرا.. إليك 7 طرق سهلة

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»