رئيس التحرير أحمد متولي
 لصحة شعرك.. هذه بدائل الكيراتين والبروتين

لصحة شعرك.. هذه بدائل الكيراتين والبروتين

استخدم كيراتين ولا بروتين؟ مفيش حد فينا موقعش في الحيرة دي. بس عشان نفصل حيرتك في الموضوع ده سألنا رئيس المركز القومي للبحوث السابق والأستاذ بقسم الأمراض الجلدية بالمركز الدكتور هاني الناظر.

«الناظر» بيقولك ابعدي عن الكيراتين والبروتين واستخدمي الزيوت الطبيعية.

ليه نبعد عن الكيراتين والبروتين؟

رئيس المركز القومي للبحوث بيقول إن الكيراتين هو البروتين هو الكولاجين، ومفيش فرق بينهم، والفرق بس في اختلاف الأسامي.

وبيوضح إن الكيراتين مادة طبيعية موجودة في جلد راسنا من أول ما اتولدنا بس المشكلة الكبيرة فيه دلوقتي هو المواد اللي بتضاف ليه زي الفورمالين، وغيرها من المواد اللي بتخلي الشعر مفرود لفترة طويلة.

ويشير «الناظر» إلى أن فرد الشعر ده هيسببلك سرطان والتهابات في فروة الرأس وسقوط شعرك بغزارة وجفافه وتقصيفه، وكمان هيسببلك اكزيما مزمنة هتخليكي دايمًا عايزة تهرشي من كتر الإلتهابات اللي في شعرك.

وعشان كده «الناظر» بيقولك لازم تبعدي عن أي كريمات بتفرد الشعر ومتنخدعيش بأسمائها.

الزيوت الطبيعية

أما بالنسبة للزيوت الطبيعية فـ«الناظر» بيرشحلك تستخدمي زيت «اللوز الحلو»، و«زيت الزيتون»، و«زيت السمسم»، و«زيت بذر الجذر» وطريقة استخدام أي زيت منهم هتبقى عن طريق حمام زيت تعمليه من مرتين لـ3 مرات في الأسبوع والزيوت دي فايدتها واحدة وهي إنها بتطري وبتغذي وبتمنع سقوط الشعر.

السيشوار للفرد

لو عايزة شعرك يكون مفرود كمان يبقى استخدمي السشوار بس يكون على درجة حرارة متوسطة مش عالية، ولو بتقولي لنفسك طب ما برضه السيشوار استخدامه ممكن يجفف شعري، «الناظر» بيقولك متقلقيش ده مش هيحصل لأنك بتستخدمي الزيوت الطبيعية معاه والموازنة ما بين استخدامك للزيوت والسيشوار هتحمي شعرك من إن يحصله جفاف.

ولو عايزة تسألي دكتور هاني الناظر أي سؤال تقدري تسأليه من خلال صفحته على موقع التواصل الإجتماعي فيس بوك من هنا.

 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»