ضي جمال تكتب: ماما بتخبي عنك ايه؟
كلنا عارفين أي أم بتستحمل عشان ولادها قد إيه. بس هل إحنا عارفين فعلا هيا بتعمل عشانا إيه وتخبي علينا إيه؟ الأم بتسمع وتشيل وتخاف وتدبر. الأم بتخبي علينا حجات كتيرر منعرفش عنها حاجة. ووسط كل ده من السهل علينا نسيبها ونهاجر نسافر نشتغل بالـ24 ساعة بره، ولو شفناها 5 دقايق يبقي كويس.
والوقت جه عشان نعرف هيا مخبية علينا إيه بس عشان هيا أم، وعشان أنت تقدر كل اللي عملته وإللي لسه بتعمله.
زعيق باباك
كام مره باباك زعق فيها لمامتك عشان أي حاجة غلط أو مش غلط أنت عملتها؟ كتير، وطبعا الجملة المعتادة اللي بيقولها: «ابنك عمل يا هانم. بنتك قالت يا مدام» .. وفي الآخر الأم تعيط وتزعل وتسكت. وتدخل عليها وتسأل مالك يا ماما؟ ترد عليك: «لا مفيش حاجة عيني اتطرفت أو عندي برد».
آخر حته
الأم زينا كائن بيجوع، بس كام مرة أنت بتاكل وجعان وكان نفسها هي في آخر قطعة جاتوه بالفواكه، ولا آخر لقمة جبنة وفول في الطبق؛ وقالتلك كلها أنت يا حبيبي أنا شبعت. كتيرر كانت جعانة بس سابتك أنت تاكل وتشبع وهي تتصرف بعدين.
آخر مليم
«ماما أنا عايز فلوس.. مصروفي خلص.. نفسي في بلوزة عباني جدا» طبعا كل جملة من دول لو اتقالت لأي أم هتطلع آخر مليم معاها من مصروف البيت وهتديهولك على طول، حتى لو كانت معاها مرتب ونفسها تشتري حاجة لفسها هتبديك عليها، وهتقولك الفلوس ديه زيادة خدها أنت. وأكيد هتخبي عليك أنها آخر فلوس معاها. المهم أنها تفرحك ومتكسرش بخاطرك.
ضعفها
سواء كانت مامتك بتشتغل أو ست بيت، فأغلب الستات بيكونوا أقوياء الشخصية في الشغل مع الموظفين اللي معاها، أو في بيتها بصفه عامة مع جوزها بتتناقش وتتخانق معاه، إلا معاك أنت بتكون ضعيفه؛ بمعني طلباتك أوامر.. مصلحتك أوًلا؛ خاصة لو أنت بعيد عنها في بلد تانية أو بتتأخر كتير بره البيت. قلقلها وخوفها عليك بتخبيه عنك عشان جملتنا المعتادة «ماما أنا مش صغير متخافيش». لكن هي هتفضل شيفاك صغير .
بكاءها عشانك
بتتخانق مع صحابك في شغلك، بتجيب نتجية وحشة، فتعيط وتبكي، وتقولها «سبيني لوحدي مش عايز أتكلم مع حد». تسيبك زي ما سياتك أمرت وتطلع بره تعيط عشانك، وقلبها يتكسر مش عشان اللي حصلك، لا عشان أنت بس موجوع. تخبي عليك كل وجعها، وطبعا تفضل تستني لحد ما مزاجك يتعدل.
الإصابات اليومية
كل واحد مننا بيرجع من المدرسة والشغل والكلية عايز يأكل بسرعة البرق من كتر جوعه. وطبعا ماما لازم تكون محضرة الأكل وحطاه كمان على السفرة. محدش فينا بياخد باله من لسعتها من النار والزيت و جرح السكينة في صوباعها. بس همنا الأول على الأكل. وهي طبعا بتخبي إيدها قدامنا عشان منشفش، والمهم عندها الأكل عجبنا ولا لأ، ولو أخدنا بالنا من إصابتها تقولنا: « فداكوا المهم الأكل عجبكم».
مدحك
بنسبة كبيرة جدا، حب واحترام أهلك وقرايبك ليك من مدح مامتك فيك من وراك، وحكاويها عنك وعن اللي بتعمله معاها، حتى لو بالفعل مكنتش بتعمل حاجة معاها، إلا أنها لازم هتقول بتساعد، بيهتم، بيخاف، حنين، طيب جدا. وكل الصفات دي هتلاقي أهلك وقرايبك وصحبتها بيكرروها، بس عشان هي قالتها حتى لو مشفوهاش فيك.
أنت السبب
مش هنتكلم بصفة عامة، هنقول في نسبة كبيرة جدا من الأمهات بتكرس حياتها كلها لولادها، وبتضطر تكمل حياتها الزوجية بس عشان ولادها. وبتخبي عليهم سوء معاملة الأب، والمشاكل إللي بتحلص بينهم بس عشان متكرهموش في أبوهم. خليك عارف دايما أن مامتك فكرت أكتر من مرة فى الانفصال، بس أنت السبب في تحملها لمعانتها مع أبوك.
بتتعاير بيك
في مجتمعنا حجات كتير بتتعاير بيها الأم، زي لو جابت بنات بس ومجبتش ولاد بيسموها «أم البنات». ولو أهل جوزها صعايدة تفضل طول عمرها تتعاير بيكم. لو أنت ولد بس مش ناجح ،برده بتتعاير بيك، وبيتقال «ابنك مش فالح ابنك فاشل». ورغم كدا الأم بتخبي كل المعايرة دي، ودايما تشجعك وواقفة جنبك وشيفاك أحسن واحد في الدنيا.
تعبها
وأنت صغير فضلت سهرانة عشان أنت تعبان، وكان مطلوب منها برده تلبي طلبات البيت. وطبعا عشان هي إنسانة تعبت من كتر اللي بتعمله، بس خبت عليك تعبها. خبت عليك ألمها وهي واقفة على رجلها بتحضر الأكل وبتغسل وبتكوي. خبيت عليك مرضها عشان متقلقش عليها أو تعطل نفسك وتوديها للدكتور.
اقرأ ايضا http://shbabbek.com/SH-38559 http://shbabbek.com/SH-10077 http://shbabbek.com/SH-37465
