رئيس التحرير أحمد متولي
 نماذج محاكاة لطلاب الجامعات

نماذج محاكاة لطلاب الجامعات


لطلاب الجامعات.. يعني ايه نموذج محاكاة؟

لو أنت من سعداء الحظ اللي  داخلين الجامعة جداد أو حتى بقالك فترة جوة الجامعة، في شوية حاجات لازم تعرفها  من ضمنها أشكال  الأنشطة الطلابية المختلفة جوة الجامعة ومنها «الأسر- الاتحادات- نماذح المحاكاة».

شبابيك يعرض في هذا التقرير ماذا تعني نماذج المحاكاة والهدف من ورائها وكيف تخدم طالب الجامعة.

يعني إيه نماذج محاكاة؟

هو  محاكاه "تقليد" لهيئه أو مؤسسة أو لفكرة مجتمعية دولية أو محلية بيتم فيها محاكاة الواقع الفعلي وتكون قائمة على محاضرات تفاعلية بين الطلاب علشان تكون نفس المراحل السنيه بتنقل خبراتها لبعضها، فهي نماذج مصغرة لمؤسسات كبيرة زي «الرئاسة الأمريكية، والأمم المتحدة، ومجلس الشعب، ومنظمة المؤتمر الإسلامي».

طيب ايه الهدف منها؟

والهدف من النماذج دي أنك تتدرب وتكسب مهارات تأهلك أنك في يوم تبقي وزير، رئيس, بتشتغل في البورصة، طيب لو مبقتشي وزير وجودك فى أي نشاط طلاب أو نماذج المحاكاة بيأهلك أن تشتغل أي حاجة وبيكسبك مهارات مختلفة لسوق العمل.

طيب  إزاي تقدر تشترك في النماذج دي؟

بص هما هتلاقيهم منتشرين  في الجامعة لابسيين زي موحد وبيقفوا يشرحوا للناس  الهدف من النموذج بتاعهم أو هتلاقيهم في  مكان مخصص ليهم «BOOTH»، يعني مثلا لو انت في جامعة القاهرة هتلاقي النماذج كلها في شارع كلية اقتصاد وعلوم سياسية  وروح هناك وتعرف علي كل نموذج وشوف اللي يناسبك منهم.

طيب بعد كدة هتعمل ايه ؟

بعد ما تختار النموذج اللي يناسبك  هتملي استمارة وبعد كدة هيتحددلك ميعاد الانترفيو بتاعك ولو اتقبلت هيبقي في الاغلب  كل يوم جمعة عندك جلسة هيتشرحلك فيها  حاجتين محتوي اكاديمي وهتتعلم مهارات «تنظيم وقت- مهارات عرض-القيادة.....» وفي النص كدة شوية العاب تطبيقية عشان متزهقش.

طيب هو أنا أقدر أعمل نموذج بنفسي؟

أه يا سيدي تقدر بس لازمله شوية شروط منها:

♠ الأول أتأكد أنه مسموح في الكلية.

♠ جهز عرض شامل الافكار والاهداف وهدف المحاكاه والاوجهه المستفاده منه عشان تقنع آحد الاساتذه الجامعين  أنه يشرف عليه.

♠ هتقدم طلب للكلية بفكرة النماذج وهدفه ولازم يكون  ممضي من المشرف الاكاديمي.

♠  لازم تكون مكون هيكل تنظيمي للنموذج  يعنى رئيس ونائب ورئيس لجان تنظيمية ورئيس لجان اكاديمية.

♠لازم تروح تاخد موافقة ولو شفاهية من النموذج اللي انت عاوز تحاكيه، يعني مثلا لو عاوز تحاكي وزارة الدفاع الأمريكية لازم تعرض المشروع علي السفارة الامريكية هنا في القاهرة.

طيب والإجراءات المادية؟

لا الاجراءات  مفيش رسوم تشغيل بس هو لازم يكون معاه مبلغ عشان شراء الموارد المادية، منها بروشور وبنرات، ومستلزمات لتنظيم الفاعليات الخاصة بهم، والنماذج ديه بتبحث على راعي ليهم بحيث يشيل عنهم التكاليف المادية.

 

أميرة خالد

أميرة خالد

صحفية مصرية متخصصة في الشأن الطلابي