رئيس التحرير أحمد متولي
 رغدة جلال الدين تكتب: 6 دروس اتعلمها من مدرسة محمود عبد العزيز

رغدة جلال الدين تكتب: 6 دروس اتعلمها من مدرسة محمود عبد العزيز

«بفضفض وأضحك وأغني في قاعدة حلوة لغاية ما أموت». الجملة ديه كانت من ضمن مونولوج قاله محمود عبد العزيز وهو بيجسد شخصية الشيخ حسني في فيلم الكيت كات. وكأنه كان بيوصف حياته اللي متعنا فيها بمجموعة من الأدوار المختلفة اللي فضفض فيها لحد البكا وضحك لحد ما كركر وغنى لحد ما بهجج قلوب الكل. وكل دور من الأدوار ديه مش بس متعتنا لأ ده كمان نقدر نتعلم منها حاجات كتيرة تفضل معانا لحد آخر العمر. 

الطيبة وفرض الشخصية

الراجل الطيب اللي أول لما تشوفوا لازم تحبه لأنه ببساطة بيتسرسب لقلبك بسرعة البرق ومهما عمل من مواقف تزعل عمرك ما تقدر تزعل منه لأنه بإبتسامة من وشه البشوش تخليك تصفى ليه. بس برغم من طيبته الا ان برضه محدش يقدر يستهين بيه لأنه عنده شخصية بتفرض نفسها في كل مكان تروحه.

هي ديه شخصية الشيخ حسني في فيلم الكيت الكات اللي بتعلمك إن متخليش طيبتك تنسيك انك تفرض شخصيتك عشان محدش يقدر يستهيفك. والكل يكون بيحبك عشان نيتك الصافية الجميلة وفي نفس الوقت عملك حساب لأنك فارض شخصيتك.

البهججة 

متخليش حاجة تضايقك لأنك هتعيش مرة واحدة بس وحاول انك تفرح نفسك بأي طريقة لأن القلب محتاج من وقت للتاني انه يتبهجج ويعيش حالة فرحة. وديه البهججة اللي نقدر نتعلمها من شخصية مزجانجي في فيلم الكيف اللي قدر انه يضحكنا بحواراته  يعني طبعًا كلنا فاكرين لما قال «ده أنا بدهبزه و أدههرزه عشان يبرعش ويحنكش و يبقى آخر طعطعة» ولا لما غنى  يا حلو بانت لبتك أول مادابت قشرتك تحرم عليا محبتك وراح أتوب أتوب عن سكتك  :)

​​​​​​​

اسعاد الناس

الناس في الظروف اللي احنا عايشينها ديه محتاجة حد يفرحها ويطيب خاطرها ولما تفرح الناس بأي طريقة  هتحس انت كمان بفرحة. واتعلم من منصور بهجت  في فيلم الساحر اللي كان بيحاول يسعد الناس دايمًا لأن فرحتهم كانت دوا لنفسه اللي مرت بظروف صعبة كتيرة وكأنه بيلاقي سعادته في سعادة غيره.

الثقة بالنفس 

وعلى الرغم ان صوت المزجانجي في  فيلم الكيف كان وحش لكنه كان واثق من نفسه وتحدى الكل عشان يحاول يثبت ان صوته حلو وفعلًا غنى وبقى ليه شرايط واتشهر. وديه الحاجة اللي تقدر تتعلمها منه وهى انك تكون واثق من نفسك وتحاول تحقق اللي انت عايزه ومتسمعش كلام الناس وتخوض التجربة انت بنفسك ولو نجحت يبقى تمام قوي ولو منجحتش مش مشكلة بس اسمك اتعلمت ونولت شرف المحاولة.

الجدعنة

أبو المعاطي وقف وقفة جدعنة مع الممثلة سلوى في مسلسل البشاير اللي حصلها حادثة وغرقت بعربيتها عندهم  في القرية وخدها هو وراعها هو أسرته لحد ما اتشد حيلها. والجدعنة حاجة حلوة قوي نتعلمها من شخصية أبو المعاطي لأنك لما تقف جمب الناس في المواقف الصعبة قد ايه هيقدروك ويحترموك وربنا كمان هيحبك وهيوقفلك ولاد الحلال يوم ما يحصل ليك أي موقف صعب.

الحكمة

عبد الملك زرزور في فيلم ابراهيم الأبيض كان بيفكر ويركز قبل أي حاجة يعملها وكان كلامه كله حكم على رأي عزيزة في مسلسل سجن النسا. وديه حاجة مهمة جدًا لازم كل واحد مننا يتبعها في حياته لأن السرعة في اتخاذ اي قرار في حياتنا ممكن يوصلنا لنتايج غلط ولازم أي قرار نمر بيه نفكر فيه كويس جدَا.  ويكون عندنا حكمة زرزور في الحكم على الأمور.    

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»