ورا كواليس كتير من مطربين ومطربات الزمن الجميل اللي اشتهروا وبقى نجمهم في السما ملحنين وشعراء كانوا السبب في شهرتهم دي.

لأن زي ما انتوا عارفين الصوت الحلو لوحده مش كفاية، ولو مكنش اتكتب ليه كلمات تمس مشاعر الناس، ولحن يتسرسب جوا روحهم، يبقى الصوت ده عمره ما هيوصل للشهرة أو هيوصل ليها فترة معينة وبعدين يختفي.

وفي التقرير ده من «شبابيك» هنعرفك على ملحنين وشعراء كانوا وراء أصوات مست قلوبنا كلنا. 

اسمهان

- امتى حتعرف

«امتى حتعرف امتى إني بحبك أنت امتى هتعرف»، كتب كلمات الأغنية دي مأمون الشناوي اللي بيعتبر من أبرز شعراء مصر، وكتب كلمات أشهر أغاني نعرفها زي «أنساك» لأم كلثوم، و«كل ده كان ليه» لعبد الوهاب، و«أنا لك على طول» لعبد الحليم.

أما اللي لحن أغنية «امتى حتعرف» فهو محمد القصبجي عازف عود الست أم كلثوم اللي عزف معظم أغانيها وكان بيدرب محمد عبد الوهاب على عزف العود. وغنت أسمهان الأغنية دي في فيلم «غرام وانتقام».

- محلاها عيشت الفلاح

«محلاها عيشة الفلاح مطمن قلبوا ومرتاح» غنتها أسمهان في فيلم «يوم سعيد» وكلمات الأغنية لبيرم التونسي اللي بيعتبر أشهر شعراء العامية المصرية، والتلحين كان لموسيقار الأجيال محمد عبد الوهاب، اللي قدر إنه يجمع بين مواهب فنية متعددة بجانب الغنى، وهى التلحين، والتأليف، والتمثيل.

- ليالي الأنس في فيينا

«نسيمها من هوى الجنة نغم في الجو له رنة سمعها الطير بكى وغنا»، أحمد رامي هو اللي كتب الأغنية دي، وهو زي ما انتوا عارفين  كان بيعشق أم كلثوم وكتب ليها مجموعة من الأغاني اللي بتعبر عن حبه ليها منها «رق الحبيب».

أما اللي لحن أغنية «ليالي الأنس» فهو أخو أسمهان فريد الأطرش، وهو اللي لحن ليها مجموعة من الأغاني التانية زي «بدع الورد». 

صباح

- زي العسل

«في البعد عاشقاه في القرب عاشقاه.. زي العسل على قلبي هواه»، كتب الأغنية دي الشاعر محمد حمزة صاحب كلمات أغنية شادية الشهيرة «يا حبيبتي يا مصر».

واللي لحن الأغنية بليغ حمدي اللي هو من أهم الملحنين اللي مروا على مصر، وبليغ لحن مجموعة من الأغاني لعدد كبير من المطربين منهم عفاف راضي، وعبد الحليم حافظ، ومحمد رشدي، وشادية، ووردة، وغيرهم.

 

- لأ

«يا ملوعلي قلبي دقة دقة، يا مضيعلي عمري خصام وفرقة»، كتب كلمات الأغنية دي مأمون الشناوي، ولحنها محمد الموجي اللي بيعتبر أحد أبرز المجددين في الموسيقى والغناء العربيين بعد ثورة يوليو 1952، وأول أغنية لحنها كانت أغنية «صافيني مرة» اللي غناها عبد الحليم حافظ.

​​​​​​​

 

- أمورتي الحلوة

«أمورتي الحلوة بقت طعمة ولها سحر جديد لها خفة روح لما بتضحك بتروح لبعيد» الشاعر حسين السيد كتب كلمات الأغنية دي، وهو رائد من رواد الكتابة لأغاني الأطفال فهنلاقيه كتب أشهر الأغاني اللي بنحب نسمعها زي «ذهب الليل»، و«ماما زمانها جاية».

واللي لحن الأغنية بليغ حمدي اللي هو نفسه لحن لصباح مجموعة من أشهر أغانيها منها «عاشقة وغلبانة»، و«يانا يانا»، و«كل حب وأنت طيب». 

شادية

- ان راح منك يا عين

«إن راح منك يا عين هيروح من قلبي فين القلب يحب مرة ميحبش مرتين»، فتحي قورة كتب كلمات الأغنية دي لأنه كان متعود يكتب أغاني بتتميز بالطابع المرح والطابع ده بيبان في أغنية «وحياة قلبي وأفراحه» اللي كتبها لعبد الحليم حافظ، و«قلبي ومفتاحه» لفريد الأطرش وغيرها من الأغاني.

ولحن الأغنية منير مراد أخو المطربة ليلى مراد اللي بيعتبر رائد في الموسيقى العربية اللي بتتميز بالطابع المرح الاستعراضي الراقص، وده بيبان في الألحان اللي عملها لعبد الحليم حافظ من خلال أغنية «ضحك ولعب وجد وحب»، وأغنية «قاضي البلاج»، ولحن لشادية كمان بجانب الأغنية دي أغاني كتيرة زي «حاجة غريبة»، و«سوق على مهلك سوق»، و«ألو ألو إحنا هنا»، و«يا سارق من عيني النوم».

 

 

- أه يا أسمراني اللون

«تحت الرمش عذاب وحنين وعذاب وعيون ما تنام.. دقت معاك طعم الايام دلوقتى تغيب يا سلام» كتب كلمات الأغنية دي الشاعر عبد الرحمن الأبنودي أو «الخال» زي ما الكل كان بيناديه.

«الأبنودي» كتب لمجموعة كبيرة من المطربين سواء أغاني منفردة زي أغنية «عدى النهار» لعبد الحليم حافظ أو تترات لمسلسلات شهيرة زي تتر «خالتي صفية والدير»، أو أغاني اتغنت جوا الأفلام زي «البريء». أما ألحان الأغنية لبليغ حمدي. اللي لحن لشادية مجموعة من الأغاني منها «مكسوفة»، و«قولوا لعين الشمس»، و«خلاص مسافر».

محرم فؤاد

- رمش عينه

«رمش عينه اللي جرحني رمش عينه اللي دبحني رمش عينه»، كتب الأغنية الشاعر مرسي جميل عزيز أو «شاعر الألف أغنية»، واللي كتب أغانيه بألوانها المختلفة العاطفية، والوطنية، والشعبية، والدينية، أما الألحان لمحمد الموجي.

​​​​​​​

- الحلوة داير شباكها

وأغنية «الحلوة داير شباكها شجرة فاكهة ولا في البساتين» برضه لحنها محمد الموجي وكتب كلماتها مرسي جميل عزيز، والأغاني دي تعتبر من أشهر الأغاني للمطرب محرم فؤاد.

 

محمد رشدي

- كعب الغزال

«كعب الغزال يا متحني بدم الغزال.. متبطل تمشي بحنية لا يقوم زلزال»، كتب كلمات الأغنية حسين السيد اللي  كتب معظم الأغاني اللي بنحب نسمعها زي «أبجد هوز» لليلى مراد، و«يا أبو ضحكة جنان» لفريد الأطرش، و«عقبالك يوم ميلادك» لعبد الحليم حافظ، و«يا مسافر وحدك» لعبد الوهاب، أما الألحان لمنير مراد.

 

- تحت الشجر يا وهيبة

«تحت الشجر يا وهيبة ياما كلنا برتقال.. كحلة عينيك يا وهيبه جارحة قلوب الجدعان»، كتب الأغنية عبد العظيم عبد الحق اللي بجانب تلحينه لأغاني المطربين لحن تترات مسلسلات «هارب من الأيام»، و«الضحية»، و«الرحيل»، وكمان مثل في مسلسل «الشهد والدموع» وغيرها من الأعمال. 



0
0
0

شارك المقال


صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»