رئيس التحرير أحمد متولي
 صحفي ديجيتال ميديا.. طب يعني إيه وإزاي؟

صحفي ديجيتال ميديا.. طب يعني إيه وإزاي؟

لو نفسك تكون صحفي «ديجيتال ميديا» بس مش عارف أيه المهارات اللي تقدر أنك تكون من خلالها متميز، في الموضوع ده من «شبابيك» هنعرفك على كل حاجة بداية من أيه هو تعريف الـ«ديجيتال ميديا»، والمواقع اللي هتفيدك في الشغل.

يعني أيه؟

الصحفي بموقع «دوت مصر» طلال رسلان بيعرّف صحفي الـ«ديجيتال ميديا» على إنه الصحفي اللي بيقدر يحول النص المكتوب لشيء مرئي ومسموع سواء كان فيديو، انفوجراف، Gif، وساوند كلاود.

مهاراتك

«رسلان» بيقولك إن صحفي الـ«ديجيتال ميديا» لازم يكون على دراية كاملة بتطور الإعلام والصحافة في العموم عشان يقدر إنه يكون مواكب للتغير اللي بيحصل فيها وده من خلال متابعة السوشيال ميديا بشكل كويس جدًا، بحيث يقدر في الآخر محتوى مختلف جوا الموضوع.

شئ أساسي في المحتوى ده هو استغلال الأدوات زي الـEmbed، التويتة، البوست، الفيديو واللي يخدم المادة الصحفية بتاعتك كصحفي «ديجيتال ميديا»، وكمان لازم تعرف إزاي تحول أي محتوى في إيدك مهما كان عدد حروفه لشيء مرئي معمول بأسلوب مشوق.

للصحفيين.. 5 أفلام أجنبية هتفيدك في الشغل

عنوان ديجيتال

«رسلان» بيقولك إن عنوان المحتوى الديجيتال وعنوان الموضوع العادي للنص المكتوب تعتبر خصائصه، واحدة بمعنى إنه يكون جاذب للقاريء ويخليه عنده فضول إنه يدخل يقراه، ويكون واضح ومباشر، وغير مضلل يعني متكتبش في العنوان حاجة هي مش موجودة جوا المحتوى بغرض إنك تجذب القاريء ليك لأن أنت كده بتخدعه مش بتجذبه ليك.

ولازم تحط في بالك إن 75% من اللي بيدخلوا على المواقع بيدخلوا عليها من على الموبايل فبالتالي بيكون القاريء معندوش وقت، زائد كمان إنه بيكون عامل حساب الباقة اللي ممكن تخلص فلازم العنوان يكون جذاب عشان يقدر يدخل يشوف المحتوى اللي أنت مقدمه بسرعة.

مواقع هتساعدك

موقع انفوجراف، time line js، Giphy، Wordle كل دي مواقع هتفيدك في تقديم محتوى «ديجيتال ميديا» مختلف، وكمان «رسلان» بيقول إن عليك الاستفادة من محتوى الديجيتال ميديا اللي بتقدمه المواقع الأجنبية زي موقع Buzz feed.

الإعتماد الذاتي

الصحفي والمدرب الإعلامي المتخصص في الـ«ديجيتال ميديا» خالد البرماوي بيقول إنك عليك الاعتماد على  نفسك وتدور على المحتوى الديجيتال اللي عايز تستخدمه وتجربه لغاية ماتوصل للنتيجة المتميزة اللي أنت عايزها، وأهم حاجة أنك تكون عندك معرفة صحفية كبيرة ودارس لتفاصيلها عشان تعرف إزاي تحول الخبر، أو التقرير، أو التحقيق لمحتوى مختلف.  

 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»