رئيس التحرير أحمد متولي
 بتبدأ مشروع؟.. قائمة بأبرز مساحات العمل المشتركة وفوائدها

بتبدأ مشروع؟.. قائمة بأبرز مساحات العمل المشتركة وفوائدها

رائد أعمال مبتدىء وبتدور على مكان تتقابل فيه بشكل مستمر مع الفريق اللي اختارته عشان تبدأ مشروعك الجديد؟ يبقى أنت محتاج م​​​​​​​ساحة عمل مشتركة «Coworking space​​​​​​​»، تقدر تأجرها على حسب الوقت اللي أنت محتاجه، والمساحة دي بتكون مجهزة بكل الحاجات اللي أنت محتاجها من مكاتب، وكراسي، وإنترنت، وكافيتريا تقدم ليك المشروبات اللي محتاجها.  

وفي مصر موجود مجموعة من مساحات العمل المشتركة اللي هنرصد ليك بعضها في الموضوع ده من «شبابيك»، وهنقولك الفوائد اللي هتعود عليك من وجودك في تلك المساحة.

WOORK HUB

أهم ما يميز المكان هو تصميمه اللي بيشبه مساحة العمل المشتركة الموجودة في أوروبا وأمريكا، ومش بس المكان لأ ده كمان السعر مناسب جدًا يعني ممكن تقضي يوم كامل من 9 الصبح لـ 11 بالليل بـ 50 جنيه بس، وكمان ممكن تشترك بالشهر والأوضة تكون محجوزة ليك. ومساحة العمل هناك بتكون مجهزة بالمكاتب، والكراسي، وشبكة إنترنت سريعة، وكافتيريا بتقدم المشروبات، المأكولات، وغرفة اجتماعات، ومحاضرات، ومكتبة وغيرها من الحاجات.

ولو عايز تعرف معلومات أكتر ادخل على الموقع من هنا أو كلمهم كل يوم من الساعة 9 الصبح لـ 11بالليل على أرقام 0223505359، 0223505360

عنوان المكان 73 شارع أبو داوود الظاهري- مدينة نصر.                          

  10 سمات ينبغي توافرها في «رائد الأعمال»​​​​​​​

District​​​​​​​

أول مساحة عمل تم إنشائها في مصر سنة 2011، وفيه المساحة المناسبة اللي محتاجها عشان تقدر تعمل الاجتماع اللي أنت عايزه، ومش بس بتوفرلك مساحة للاجتماع لأ ده أنت كمان لو عايز يكون ليك مقر عندهم لمدة معينة تستقبل فيها شركائك بيقدموا ليك خدمات مختلفة زي عنوان عمل، ورقم تليفون، وخدمات الاستقبال.

والمساحة مزودة كمان بكافيه فيه اختيارات مختلفة من الأغذية والمشروبات. ومش مقتصرة بس على اجتماعات الشغل لأ كمان بيتم فيها عمل حفلات مختلفة سواء غنائية، أو موسيقية، أو حفلة عيد ميلاد.

  • عنوان المكان:

51B طريق مصر- حلوان، المعادي، ولو عايز تعرف المكان فين بالظبط اتصل على022380 2120

وفيه عنوان كمان موجود في 18 شارع النصر، المعادي، ورقم التليفون للإستفسار هو022517 2552

أو ادخل على لينك الموقع من هنا عشان تعرف معلومات أكتر. 

مكعب

لو أنت من محافظة الإسماعيلية وبتدور على مساحة عمل مشتركة يبقى قدامك «مكعب»، اللي هو أول مساحة عمل مشتركة اتعملت في الإسماعيلية. والمساحة دي هتوفرلك إنك تعمل اجتماعاتك من غير إزعاج، وكمان هيكون فيه إنترنت سريع وكل الحاجات اللي هتكون محتاجها عشان تنجز شغلك. ده بجانب إن المكان بيقدم كورسات مختلفة في كل المجالات بداية من إدارة الأعمال اللي هتفيدك في شغلك لغاية تعليم العزف على الآلات الموسيقية.

عنوان «مكعب»: شارع السلطان حسين، البرج اللي فيه معمل البرج، الدور الرابع، ورقم التليفون 0121 220 5513.

كيف تتعلم من الفشل؟.. نصائح من رواد الأعمال

El Maqarr

هتلاقي في «المقر» كل الإحتياجات اللى أى حد ممكن يحتاجها فى شغله، سواء المكان نفسه اللى مجهز ومصمم لتلبية الاحتياجات دي، أو البيئة والجو اللى بيشجع الفرد إنه ينتج أكتر، وبالتالى يبدع أكتر من خلال المشاركة. وهدف «المقــر» إنه يخلي الناس كلها تعرف بعض، فيبدأوا يتفاعلوا ويتعاونوا ويشتغلوا كل واحد مع التانى. عشان كده هتلاقي لما تروح إن كل الناس بتساعد وتدعم بعض.

عنوان «المقر» 17 شارع ابن سينا، صلاح سالم، هليوبوليس، ورقم التليفون0100 774 4121.

توفير فلوس ايجار مكان

صاحب مشروع فابريكا محمد البيك، بيقولك من خلال تجربته مع مساحة العمل المشتركة «فاب لاب» إنك بتوفر على نفسك فلوس كتير بمعنى إنك بدل ما هتأجر ليك شقة في عمارة بفلوس كتيرة عشان تبدأ مشروعك تقدر تأجر ليك مكان جوا مساحة العمل دي بأقل التكاليف.

وطبعًا هتوفر جانب فاتورة الكهرباء والمايه، ومرتب عامل النظافة وكل حاجة كنت هتتحمل تكلفتها لو كنت أجرت مقر ليك. 

تبادل الخبرات

من الفوائد كمان اللي هتعود عليك إنك هتلاقي معاك في نفس المكان ناس عندهم خبرات كتير في أي حاجة أنت محتاجها فهتقدر تسألهم في أي حاجة أنت عايزها وتفيدهم كمان في أي حاجة هما عايزينها وتستفيد من خبرتهم بحيث يطلع مشروعك بشكل كويس.

10 سمات ينبغي توافرها في «رائد الأعمال»

ويب سايت بأقل التكاليف

وبيقولك «البيك» إن لما حد يجي يعملك ويب سايت ممكن ياخد منك فلوس كتيرة لكن وأنت في المكان هتلاقي اللي لسه باديء زيك وهيعملك ويب سايت بأقل التكاليف فهتلاقي في الآخر عناصر مشروعك اكتملت. وفيه خدمات تانية كتيرة بتوفرها المساحة زي الإنترنت السريع، والكافيتريا اللي فيها مختلف الأغذية والمشروبات وغيرها من الخدمات.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»