حسام دهبي من محافظة أسيوط

قصيدة حبك وجع

حبك وجع

قلبى أتوجع

من حُسنك الفَتان

قلبى الجدع مبقاش جدع

قصاد عنيكى البندقى

قرر يعيش إنسان

إنسان وطاير فى السما

تارك جبال أحزان

عايش بقاوم إنما

مكسور من الحرمان

دايب من الخوف والحنين

جوايا شوق بركان

صدى صوتك من قوته

فى غربتى مصدر آمان

وبسمتك طرحت فى قلبى

فرحة بلون الطرحة والفستان

ياللى فراقك صرخة فى قلبى

أنا الحيران

ليكى أنا وطن  وأنا نبع الحنان

أنا اللى بحبك وانا اللى من بعد حبك

رجعت من تانى إنسان

ـــــــــــــــــــــــــــــــــ

كنت يائس و بتوَجع آهااااات

  فجأة روحت  فى عنيكى أتكعبلت

   ياللى أنتى أصل الحلويات

   وأجمل ما أتخلقت وأتسمت بنت.

ــــــــــــــــــــــــــــــــــ

كل الكلام فى العين

أصل النظرة بَواحه

لو دمعة نزلت على الخدين

تلاقيها نامت مرتاحه

كل الوجع فى القلوب

اللى كانت بالحب فَواحة.

ــــــــــــــــــــــــــــــــــــــــ

وكَإن  اللى ما بينا عهد لا هو متقال ولا هو مكتوب

كَإن اللى  ما بينا بالظبط

 حُب ممنوع منه الهروب

وكلام لو قولته قبل معادة

لاهيقربك من البعيد

ولا هيريحك فى بعادة

لو الدنيا فَجأة كَشَرت

كَشَر قصادها وأعترض

وأضحك عليها ضحك هستيرى

وعيش حياتك معترض .

ــــــــــــــــــــــــــــــــــــــ

و توهت أنا من سحر كلامك الجذاب

لا عرفت أرجع مكانى ولا حتى لقيت ل سكتى أبواب

ملكتى فرحتى رجَعتى قلبى العجوز شباب .

ولا تحلى الحياة غير بوجودك الطيب

ولا قلبى يقدر يعيش غير لما يكون من قلبك قريب

ياللى خليتى لحياتى ألف معنى ومعنى

دعائى ليكى فى صلاتى دايماً ياااااااارب جمعنا .

يابنت الحلال  يا ضحكاية

يا نور الصبح جوايا

فى عنيكى دول  صورة ومرايا

بشوف فيها فرحة الأيام

يا كل أحلامى فى لياليا

 يا لمعة الفرحة فى عنيا

فى غيابك 

تغيب الشمس من الدنيا

و أعيش من غيرك حزين حيران.

ــــــــــــــــــــــــــــــــــــــــــــــــــ

بتدَاوى فى جروح الناس

 وبتتعامل بأرق احساس

 ولأنك شخص حساس

 مش لاقى لنفسك فى الدنيا مقاس

 وبتفرح لفرح القلوب

 وعايش حياتك مع أى بسمة بتدوب

 ونفسك تعيش انسان خالى من العيوب

 وبتقاوم كل الذنوب

 بتصَبر نفسك بالقليل

 ومع أى لحظة أمل

 من الفرحة بتطير

 وبتمشى تغنى زى العصافير.

0
1
0
0
0
0
0

شارك المقال


أخترنا لك