رئيس التحرير أحمد متولي
 آية وهيب تكتب: «big hero6».. نصيحة مني صاحب روبوت

آية وهيب تكتب: «big hero6».. نصيحة مني صاحب روبوت

ناس كتير بقت بتتكلم عن خطر العالم الافتراضي، وإننا قد أيه بقينا مدمنين للسوشيال ميديا وحياتنا كلها بتدور حوالين التكنولوجيا، بس أنا مش جاية دلوقتي عشان أؤكد على الكلام ده، بل بالعكس انت ممكن بعد ما تقرأ الموضوع ده تقع في حب التكنولوجيا أكتر أو تحديدا في حب "BayMax".

bighero6videostill

لو لاقيت حد بيديلك حنان وحب واهتمام ورعاية وإخلاص ملوش حدود هيفرق معاك وقتها إذا كان إنسان أو روبوت؟ وياترى وقتها هتقول "تباً للتكنولوجيا" ولا هتتمنى يكون عندك صديق زي "BayMax"؟

بالنسبالي الإجابة هتكون.. طبعا أتمنى.. لأنه ببساطة هيغير حياتي 180 درجة ، زي ماغير حياة "hiro" الولد الصغير اللي فقد أهله وهو يدوب عنده 3 سنين، يمكن ده اللي خلى عضمه ينشف من بدري، ويتعرف على الدنيا قبل أطفال كتير في سنه، مش بس كده "hiro" كمان كان عبقري، زي أخوه الكبير "tadashi" اللي لايق عليه حكمة احمد حلمي في فيلم 1000 مبروك اللي بتقول "ما أعظم أن تكون غائبا حاضر على أن تكون حاضر غائب" فهو طول الوقت كان مخلي باله من أخوه وبيوجهه بس من غير ما يخنقه، من غير مايزعق فيه ويقوله انا الكبير وعارف مصلحتك أكتر فلازم تسمع كلامي، فمثلا لما حاول "hiro" يستغل عبقريته ديو يطلع منها فلوس في معارك "الريبوتات"، ممنعوش من ده بس كان ديما بيراقبه ووقت الخطر كان أول واحد ينقذه. يمكن عشان"tadashi" بيقدر التجربة وعارف أنها أعظم معلم، ساب أخوه يعيشها بس في نفس الوقت خد بأيده ووجهه انه لازم يطور موهبته دي بالتعليم، حتى النصيحة دي مكنتش مجرد بالكلام لأنه خده الجامعة ووراه الناس هناك عامله ازاي، خلاه يشوف ويلمس ده فيحب يكون زيهم وبالتالي ينضم للجامعة.

Tadashi_and_Hiro_ (1) وبكده ودع "hiro" مرحلة الشارع وبقى عنده هدف، إنه يحاول ينفذ إختراع يقدر يدخل بيه الجامعة، طبعا "tadashi" مسبهوش وقدره فعلا أنهم يخترعوا "mic robot" اللي ابهرو بيه كل الحضور، وحس وقتها "hiro" بالنجاح و أخيرا الدنيا هتضحكله.

لكن تأتي الرياح بما لا تشتهي السفن، يحصل انفجار في الجامعة ويكتشفوا أن دكتورهم ومثلهم الأعلى محبوس جوا الحريق، فيقدم ساعتها "tadashi" أخر درس لـ"hiro" في التضحية، ودخل الحريق عشان ينقذ الدكتور ومات وهو بينقذه.

مات"tadashi" لكن زي ما بيقولوا تموت الورده وريحيتها فيها، وهو كان ليه ريحة من نوع أخر، نوع متطور ومختلف، سابله بالونه بيضا ومنفوخة بس عقلها يوزن بلد وفيها حنية الدنيا كلها  ودي كانت هديته لأخوه الصغير.

يمكن"tadashi" مفكرش وهو بيخترع "baymax"، أنه هيخلي باله من أخوه بعد ما مات، فكان كل هدفه انه يخترع "روبوت" للرعاية الصحية، يعالج الناس من الإصابات المختلفة، بس دوره كان أكبر بكتير وعالج نفسية أخوه وقدر يرجعه للحياة والجامعة مره تانية بعد ما دخل في اكتئاب شديد بعد موته.

"baymax" من اللحظة الأولى وهو بيعمل كل حاجة وأي حاجة عشان يشوف"hiro"سعيد ، حتى طوّر من نفسه وبقى محارب خارق وجمع أصحاب "tadashi"  عشان يقفوا جنب "hiro" و يحاولوا يلاقوا الشخص اللي كان السبب في موت أخوه، بالرغم من كل ده فضل"baymax" محافظ على مبدأه انه عمره ما يؤذي إنسان وإن مهمته الأساسية علاج الناس، بذمتكوا في صديق كده، قوي وشجاع كل همه إنه يشوفك راضي ومبسوط بيحافظ على سلامتك ومستوعبك طول الوقت، لأ وغير كل ده بيضحي بنفسه عشان ينقذك، فعلا لو العالم فيه زي "baymax"فيا أهلا بالتكنولوجيا والعالم الإفتراضي.

فيلم big hero6 إنتاج شركة ديزني عام 2014 وممكن تتفرج عليه من هنا 

الكلمات المفتاحية

شبابيك

شبابيك

منصة إعلامية تخاطب شباب وطلاب مصر