الولاد قالوا كده.. دي الهدايا اللي تفرحي بيها شريكك في عيد الحب

«جايبالي ورد وأنا لسه مفطرتش».. الجملة اللي فاتت اتقالت في فيلم «الناظر»، وبالرغم من أنها اتقالت في سياق كوميدي، إلا أنها كاشفة لطبيعة الراجل اللي بيفضل الهدايا العملية بنسبة كبيرة، بعكس البنات، اللي غالبا بتبسطهم أي هدية.

في التقرير ده هنعرف المرتبطات بأبرز الهدايا اللي بتفرح الرجالة، في ضوء استطلاع رأي تواصلنا خلاله مع عدد كبير من الشباب، منهم أحمد ممدوح (اسم مستعار)، خطيبته اشترت ليه ميدالية فضة سعرها تجاوز الـ500 جنيه، والميدالية دي حاليا «اترمت في الدرج».

نصيحة في الأول

في البداية، استشاري الصحة النفسية، زينب مهدي، بتقول إن تفكير الأنثى حسي وعاطفي وأي هدية ممكن تفرحها، وغالبا بتقول لنفسها «كفاية أنه افتكرني»، أما الراجل فتفكيره بيكون مادي ونفعي بعض الشيء.. «يعني مش هتسعده غير هدية هو محتاجها».

وبتنصحك «مهدي» إنك تسألي شريك حياتك بشكل مباشر إيه الهدية اللي ممكن تفرحه، أو تحاولي تعرفي بنفسك هو محتاج إيه بشكل غير مباشر.

ملابس

 

لو كان شريك حياتك من النوع المهتم بالملابس، وبيخطط لشراء لبس معين، فأكتر حاجة ممكن تفرحي بيها شريك حياتك، أنك تجيبلو الحاجه دي، زي إنك تجيبلو تيشرت أو قميص أو سويت شيرت، ودا اللي أكدت عليه زينب مهدي.

بس استشاري الصحة النفسية، بتحذرك من أنك تجبيلو هدوم أو ألوان هو مش بيحبها مثلا..

ولو مخطوبين وفرحكم قرب فممكن يكون قميص بدلة الفرح، أو البدلة نفسها، هدية عملية بالنسبة ليه وتفرحه.

 

أما لو شريك حياتك، شخص رياضي وبيلعب كورة، فممكن تهاديه بتشيرت الفريق اللي بيشجعه.. أو شنطة رياضية، لو لاحظتي أنه بيروح النادي مثلا بشنطة عادية أو بلاستيك.

كوتشي

 

مفيش شاب ممكن يستغنى عن الكوتشي، خاصة لو كان شخص رياضي وبيحب ممارسة رياضة ما، فلو حابه تجيبي هدية حلوة هاتيله كوتشي.

شنطة

 

لو لاحظتي أن خطيبك/ زوجك، دايما بيكون في إيده حاجات كتير زي المفاتيح والموبايل والتاب، فاتاكدي أنك لو جبتي ليه شنطة صغيرة، يشيل فيها الحاجات دي هيفرح جدا، زي ما حصل مع محمود ابراهيم، اللي بيقول«ـنا جتلي هدايا كتير، بس أكتر هدية فرحتني، الشنطة الصغيرة اللي جابتهالي خطيبتي، لأني كنت عايزها فعلا».

 

وممكن تجيبي له شنطة «لاب توب» من اللي بتتشال على الظهر، لو لقيتي أن الشنطة بتاعته قديمة أو مقطوعة، وهو محتاج لشنطة جديدة.

موبايل

 

لو ناوية تصرفي وتجيبي هديه غالية بقى، ركزي على جهاز هو محتاجه.. يعني لو تيلفونه ضاع أو باظ، أو عايز «سمارت فون»، هاتيله واحد جديد.

ولو السماعات بتاعته باظت، هاتيله سماعة.. بس تكون أصلية، هيفرح بيها أكتر من أي حاجة تانيه، ودا زي ما قال محمد عبد المنصف.

أو ممكن تشحنيله الباقة.. ودي هتبقى مفاجأة حلوة.

كتاب أو رواية

 

لو شريكك مثقف وبيحب القراءة، أكيد هيفرحه كتاب أو رواية، خصوصا لو لكاتب هو بيحبه.. بس اتأكدي من أنه الكتاب ده مش معاه.

دبلة

 

عمر هشام، بيقول :«أنا دبلتي كانت ضيقة عليا جدا، وبتضايقني، وخطيبتي لما لاحظت دا جابتلي دبلة في عيد ميلادي، وبجد فرحتني ».. فلو خطيبك بيواجه نفس مشكلة «عمر» أو لسه مشتراش دبلة الخطوبة، ممكن تجيبلو دبلة هدية

محفظة جلد

 

المحفظة اللي جلدها طبيعي، بتكون قيمة في نظر الشباب، فلو لاحظتي أن محفظة شريك حياتك قديمة وخلاص بتودع، فممكن يكون خيارك المحفظة.

شنبر نظارة

 

لو شريكك بيلبس نضارة، حاولي تدوري على شمبر شيك، يليق عليه، وكمان يكون مريح له.

أو ممكن نضارة شمس، بس لو هو بيحب يلبسها.. أما بقى لو مش بيحب ده، وانت بس شايفه أنه بالنضارة هيكون حلو، فكده أنت هتصرفي فلوسك على الفاضي.

حيوان أليف

 

لو شريكك من الشباب  اللي بيهتموا بالحيوانات، يبقى لو جبتيله قطة أو كلب أو سلحفاه، يبقى قدرتي توصلي لقلبه، ودا اللي أكده أحمد إيهاب، شاب مهتم بتربية الحيوانات: «مفيش حاجة ممكن تفرحني زيهم».

الخلاصة..

الشباب بيحبو الهدايا العملية، اللي هيستفيديو بيها.. كل اللي عليكي أنك تعرفي أن فيه حاجه اسمها «فن اختيار الهدايا» زي ما شوفتي في فيلم «بلبل حيران».. وعلى الأساس ده تدوري وتشوفي خطيبك/ جوزك محتاج إيه بالظبط، مش تجيبي هدية والسلام لأن الراجل غيرك، ومش هيقول «كويس أنها افتكرتني وكلفت نفسها».. آه هياخدها منك.. بس آخرتها أنها « تترمي في الدرج»، وده أكيد هيزعلك.