رئيس التحرير أحمد متولي
 اسمع الراديو.. مسلسلات إذاعية متتفوتش في رمضان

اسمع الراديو.. مسلسلات إذاعية متتفوتش في رمضان

زمان مكنش فيه غير الراديو وقناتين بس على التليفزيون. الراديو كان بالنسبة لكل بيت متعة خاصة.

ودلوقتي رغم زيادة عدد القنوات على التليفزيون في ناس برضه لسه بتحب تسمع الراديو، وبما إن رمضان قرّب خلاص هنقول لكل محبي سماع الراديو على المسلسلات اللي هتتعرض على الإذاعات المختلفة، عشان ينبسطوا.

البخيل هو أنا

محمد هنيدي راجع يضحكوا من تاني في مسلسل «البخيل هو أنا» اللي هتسمعوه على راديو 9090 والاسم بيفكرك أكيد بمسلسل «البخيل وأنا» للنجم فريد شوقي، اللي «هنيدي» كان طالع فيه بدور «عطا» صاحب وائل نور.

في المسلسل بقى هنشوف «هنيدي» بيجسد شخصية البخيل اللي بيتعرض لمواقف كتيرة بسبب بخله، وواضح كده إن «هنيدي» عجبوا شخصية البخيل اللي جسدها فريد شوقي فحب يجسدها بأسلوبه الفكاهي الخاص.

هيشارك «هنيدي» بطولة المسلسل رانيا يوسف، وطارق عبد العزيز، ورجاء الجداوي، ونور إيهاب، والتأليف لإسلام شلباية، أما الإخراج لتامر حسني غنيم.

خلصانة بشياكة.. كوميديا مسلسلات رمضان 2017 «هربانة منها» خالص

لاسحر ولا شعوذة

على نفس إذاعة 9090 هتسمعوا برضه مسلسل «لا سحر ولا شعوذة» بطولة محمد رمضان اللي المسلسل ده يعتبر التجربة الإذاعية الأولى ليه وبتدور أحداثه في إطار كوميدي اجتماعي حوالين شاب طموح بيسعى أن حياته تكون أفضل.

منتجة العمل أمل عبد الحميد بتقول في حوار صحفي على موقع جريدة «الدستور» إن «رمضان» أخد أعلى أجر على مستوى أجور النجوم في الأعمال الدرامية الإذاعية وإنه عامل دور مختلف هيكون مفاجأة عن نمط الأدوار اللي قدمها قبل كده.

المسلسل من بطولة إيمان العاصي، ولطفي لبيب، وإنعام سالوسة، وأحمد صيام، ومن تأليف أمين جمال وإبراهيم محسن، أما الإخراج لحسين إبراهيم.

زقزوق وبكيزة

إذاعة «نغم إف أم» هيكون عليها مسلسل «زقزوق وبكيزة» اللي بتدور أحداثه في إطار كوميدي حوالين معرفة أصول الأمثال الشعبية من خلال مواقف بيتعرض ليها أبطال العمل وهما: إدوارد، وبوسي حجاج، وأميرة نور، وشريف باهر. المسلسل من تأليف شاهندة عز العرب، وإخراج محمد الخولي.

بهذه المسلسلات.. البطولات النسائية تسيطر على دراما رمضان

صورة سيلفي

على «راديو هيتس» هنسمع مسلسل «صورة سيلفي» اللي هيكون بطولة حسن الرداد، وآيتن عامر. المسلسل من تأليف محمد عبد الحميد، وإخراج علي مصيلحي.

المصدر


  •  

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»