عيش الحالة مع أغاني مسلسلات رمضان 2017.. دلّع نفسك
كل رمضان بيكون فيه مجموعة من تترات المسلسلات اللي بتحاول من أول حلقة تخلينا نعيش مع حالة المسلسل، بس احنا مش هنستنى أول حلقة وهنسمعكوا دلوقت مجموعة من تترات المسلسلات المختلفة عشان تدخلوا في حالة المسلسل بدري بدري :).
بالحلال يا معلم
أحمد سعد وسمية الخشاب هيغنوا تتر مسلسل «الحلال» والأغنية هيكون اسمها «بالحلال يا معلم»، والمسلسل بطولة سمية الخشاب، وبيومي فؤاد، ويسرا اللوزي، وتأليف سماح الحريري، وإخراج أحمد شفيق. المسلسل بتدورأحداثه في اطار الحارة الشعبية، وفيه مسلسلات تانية برضه بتدور أحداثها في إطار الحارة الشعبية هتشوفوهم في رمضان وهما «الحرباية»، و«الحساب يجمع»، و«رمضان كريم».
تعرف على مسلسلات رمضان 2017 وقنوات عرضها من هنا (1-3)
أنا جبل
أغنية «أنا جبل» هتكون تتر مسلسل «وضع أمني» وهيغنيها المطرب الشعبي «روبي»، والمسلسل هيكون من بطولة عمرو سعد اللي قدم في رمضان السنة اللي فاتت مسلسل «يونس ولد فضة». «وضع أمني» بيناقش موضوع تجارة الآثار. وبيشارك في بطولة المسلسل ريهام حجاج، ورياض الخولي، وهو من تأليف مصطفى حمدي، وإخراج مجدي أحمد علي.
تعرف على مسلسلات رمضان 2017 وقنوات عرضها من هنا (2-3)
الناس العزاز
أما مسلسل نيللي كريم «لأعلى سعر» فهتغني التتر بتاعه نوال الزغبي، وهي تاني تجربة ليها في غناء تترات المسلسلات بعد ما غنّت تتر مسلسل «كاراميل». وبيشارك في بطولة المسلسل زينة، وأحمد فهمي، ونبيل الحلفاوي، وهو تأليف مدحت العدل، وإخراج محمد العدل. وزينة في المسلسل طالعة بدور بالرينا ودي بشرة خير بتقول إن المسلسل هيكون مش كئيب.
تعرّف على مسلسلات رمضان 2017 وقنوات عرضها من هنا (3-3)
صح النوم
أحمد عدوية ومحمود الليثي هيغنوا تتر مسلسل «رمضان كريم» اللي بيقولوا من ضمن كلامها «طب خف تعوم وصح النوم». المسلسل من بطولة روبي، وسيد رجب، وريهام عبد الغفور، وتأليف أحمد عبد الله، وإخراج سامح عبد العزيز.
طاقة قدر
«أكيد في فرحة بعد الصبر أكيد هيجيلي يوم وارتاح»، حمادة هلال بيغني تتر مسلسله «طاقة قدر» اللي بيشاركه البطولة فيه سهر الصايغ، وإدوارد، وحنان يوسف. والمسلسل من تأليف أحمد محمود أبو زيد، وإخراج محمد مصطفى.
