رئيس التحرير أحمد متولي
 أفلام عيد الفطر 2017 فيها حاجة حلوة.. اعرف السر

أفلام عيد الفطر 2017 فيها حاجة حلوة.. اعرف السر

أفلام العيد السنادي فيها حاجة حلوة والحاجة دي تتلخص في أنك هتشوف كل اللي نفسك فيه؛ يعني عايز تشوف فيلم دراما هتلاقي، عايز تضحك من قلبك هتلاقي برضه، ولو عايز تشغل مخك وتحل ألغاز غالي والطلب رخيص. وكل اللي عليك أنك تختار الفيلم من القايمة دي وتقرر هتشوفوا فين ومع مين؟

الأصليين

بصمة وراثية للعين بيستخدمها فريق اسمه «الأصليين» للتجسس على الأشخاص. فكرة مختلفة بيتكلم عنها فيلم «الأصليين» اللي يعتبر أول عمل سينمائي يكتبه أحمد مراد للسينما مباشرة بدون ما يكتب رواية تتحول لفيلم زي ما حصل في «الفيل الأزرق».

فيلم الاصليين هو أول عمل سينمائي يكتبه أحمد مراد للسينما مباشرة.

وده يعتبر أفضل من أن المشاهد يشغل باله وهو بيتفرج على الفيلم بعمل مقارنات بينه وبين الرواية زي ما حصل في «الفيل الأزرق» اللي أغلب الناس اللي قروها لما دخلوا الفيلم شافوا أنه مكنش زي حلاوة تخيلهم للرواية وبدأوا في عمل مقارنات خرجتهم من مود الفيلم اللي يعتبر كان متميز من حيث التقنيات الفنية المستخدمة فيه.

والتقنيات دي موجودة بشكل كبير في فيلم «الأصليين» اللي فيه روح الإثارة والغموض اللي كانت موجودة في «الفيل الأزرق»، واللي بيعززالروح دي موسيقى هشام نزيه اللي سبق ووضع برضه موسيقى فيلم «الفيل الأزرق».

فيلم «الأصليين» من إخراج مروان حامد، وهو التعاون التاني له مع «مراد». ومن بطولة مجموعة كبيرة من النجوم منهم: ماجد الكدواني، وخالد الصاوي، ومنة شلبي، وكندة علوش، ومحمد ممدوح اللي سبق وشارك أغلبهم برضه في تجربة «الفيل الأزرق». 

عنتر ابن ابن ابن ابن شداد​​​​​​​

حفيد عنترة بن شداد هيدخل في صراع شرس وخطير ومتوحش مع «أسد الرجال» عشان خاطر يفوز بفتاة القبيلة اللي خطفت قلبه من أول نظرة. محمد هنيدي راجع لينا بفيلم كوميدي باين من عنوانه «عنتر ابن ابن ابن ابن ابن شداد» أنه هيفطسنا من الضحك.

عنتر ابن ابن ابن ابن شداد جرعة كوميدية يعود بها محمد هنيدي للسينما بعد غياب

و«هنيدي» بقالوا فترة غايب عن شاشة السينما وأخر فيلم اتعرض ليه كان «تيته رهيبة»، والفيلم ده من المنتظر أنه يكون عودة قوية لـ«هنيدي»، وهيشاركه بطولة العمل: درة، وهالة فاخر، وحمدي الميرغني، وباسم سمرة، وإيمان السيد، ولطفي لبيب. الفيلم فكرة صادق شرشر، وتأليف أيمن بهجت قمر، وإخراج شريف إسماعيل.​​​​​​​

هروب اضطراري

​​​​​​​

ابن راجل أعمال بيتقتل فبيتم اتهام شخصين كان ليهم علاقة بيه فبيضطروا يهربوا. 

أحداث من الإثارة والتشويق هنعيشها مع نجم الأكشن أحمد السقا اللي قدم السنة اللي فاتت فيلم «من 30 سنة». وقدم في رمضان ده مسلسل «الحصان الأسود». وبيشارك «السقا» بطولة الفيلم غادة عادل، ومصطفى خاطر، وفتحي عبد الوهاب، وأمير كرارة، والفيلم من تأليف محمد سيد بشير وإخراج أحمد خالد موسى. 

جواب اعتقال 

«خالد الدجوي» بيقرر أنه ينضم لجماعة إرهابية وبيعتقد أن انضمامه ليها هو جهاد في سبيل الله ولما بيقرر أخوه أنه ينضم ليها برضه بيرفض لكنه بيعاند وبينضم للجماعة وبيقتله أحد القادة جواها وبيقرر «خالد» الانتقام.

«خالد» هو محمد رمضان اللي كان غايب عن دراما رمضان بسبب أنه بيقضي مدته في الجيش واللي من المفترض أنه في رمضان 2018 هيعمل مسلسل اسمه «زين» من تأليف مدحت العدل، ومن إنتاج شركة العدل الجروب.

بيشارك محمد رمضان بطولة الفيلم مجموعة من النجوم وهم: دينا الشربيني، وإياد نصار، وصبري فواز، وسيد رجب، ومحمد عادل، وأحمد راتب اللي رحل عنا وكان الفيلم ده هو أخر عمل يقدمه لينا وأهدى محمد رمضان الفيلم لروحه اللي متعتنا بأجمل الأعمال.  

 ​​​​​​الفيلم من تأليف وإخراج محمد سامي اللي الفيلم ده هو بداية التعاون السينمائي له مع محمد رمضان، وهما سبق وتعاونوا مع بعض خلال الدراما التليفزيونية في مسلسل «الأسطورة».

الخلية

​​​​​​​​​​​​​​ظابط في العمليات الخاصة بيتصدى لأكتر من عملية إرهابية، دي فكرة فيلم «الخلية» اللي بيجسدها أحمد عز وبيشاركه بطولة العمل أمينة خليل، محمد ممدوح، وريهام عبد الغفور. الفيلم من تأليف صلاح الجهيني وإخراج طارق العريان.

تصبح على خير 

أذية المشاعر دي فكرة فيلم «تصبح على خير» اللي بنشوفها من خلال شخصية شاب غني لكن للأسف عايش حياة حزينة. الفيلم من بطولة تامر حسني، ونور، ودرة، ومي عمر، وأحمد زاهر وتأليف وإخراج محمد سامي اللي يعتبر الفيلم ده هو تاني الأفلام اللي هيخرجها في العيد بعد فيلم جواب اعتقال. ويعتبر العمل ده برضه بترجع ليه نور للسينما بعد سنين غياب طويلة سواء عن شاشة السينما أو التليفزيون. 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»