الناجح يرفع ايده.. 5 خروجات مختلفة هتبسطك بعد عذاب الثانوية

بمناسبة نجاحك السعيد في الثانوية «شبابيك» بيقدم ليك مجموعة من الخروجات المختلفة اللي تقدر من خلالها تفرفش وتنبسط وتنطلق بعد ماكنت على أعصابك وقلقان ومتوتر طوال فترة الثانوية. يلا بقى اختار الخروجة وعيش أجمل اللحظات.

مركز البولينج الدولي

المركز فيه كذا لعبة مختلفة مش بس البولينج يعني هتلاقي سباق عربيات، سباق موتوسيكلات، باسكت، بينج بونج، بلياردو، اكس بوكس، هوكي وغيرها من الألعاب اللي أسعارها في متناول الجميع. يعني سعر البولينج للفرد 20 جنيه، ودخول المركز بـ10 جنيه. وفيه كافيتريا فيها أكل ومشروبات برضه أسعارها كويسة.

المركز موجود في شارع صلاح سالم مدينة نصر ورا بانوراما حرب أكتوبر. لو عايز تسأل على حاجة اتصل على 0222612122-0222612121.

The Horror house

أفلام الرعب دايمًا بتشد الواحد وبيكون نفسه يخوض تجربة زيها مع أن رجله بتخبط في بعض من كتر الخوف. جتلك الفرصة بقى أنك تخوض التجربة في بيت الرعب اللي موجود في فرع ميراج مول عند مدخل التجمع الاول من علي طريق السويس الدور الثالث وهتمشي ورا آثار الدم وهتلاقي البيت.

وموجود كمان في فرع مول العرب في 6 أكتوبر عند بوابة 4 أمام توي ورلد، و فرع اسكندرية في الميراج مول الدون تاون. الأفضل انك تتصل وتحجز قبل ما تروح.

ودي أرقام الفروع:

ميراج مول 01090664443 

مول العرب 01098050908

فرع اسكندرية 01096828228

سعر تذكرة فرع ميراج مول ومول العرب 100 جنيه للفرد، وسعر تذكرة  فرع اسكندرية 150 جنيه. 

Hint hunt cairo

المكان ده بيقدم ليك مغامرة مختلفة جدًا من نوعها والمغامرة ديه من خلال مهمة هتقوم بيها أنت وأصحابك داخل قصة من القصص ديه. يعني فيه قصة من القصص هتبقى عبارة عن ان انتوا هتكونوا  في غواصة وهيطلب منكوا حاجتين الحاجة الأولى هتستخدموا المعدات اللي موجودة في الغواصة وده عشان تحاربوا غواصة العدو .

والحاجة التانية الغواصة هتغرق بيكوا فهيبقى مطلوب منكوا أنكوا تنقذوا نفسكوا والغواصة. السعر بيكون حوالي 155 جنيه للفرد والمكان موجود في ديستريكت مول شارع النصر، شيراتون، قدام نادي وادي دجلة شيراتون.

لو عايز تعرف تفاصيل أكتر اتصل على 01220408090 

فجنون

لعب بالطين، حرب ألوان، ركوب خيل كل الحاجات ديه وغيرها هتلاقيها في فجنون اللي موجود في 1 طريق المطار، مساكن شيراتون، مصر الجديدة. السعر بيكون 50 جنيه للفرد، والتذكرة ديه شاملة دخول المكان والنشاط الواحد اللي هتختاروا ولو عايز نشاط تاني هتدفع 40 جنيه.

محتاج تعرف لسة تفاصيل أكتر؟ يبقى اتصل عل  01224569141 - 01006818790

وادي الريان 

وممكن تعمل سفاري وتزور أماكن مختلفة زي وادي الريان مثلًا أو وادي الحيتان، العربية اللي هتعمل بيها السفاري بيكون فيها حوالي 6 أفراد وسعر العربية الغير مكيفة 1000 والمكيفة 1200 جنيه. عشان تعرف العنوان فين بالظبط وتحجز لأي حاجة أنت عايزها اتصل على 01117283321