بعد ظهور نتيجة الثانوية، كلنا عندنا قرايب وأصحاب بيحتفلوا بنجاحهم، وده هيخلينا نحتار في نوع الهدايا اللي نقدمهالهم، خصوصا بعد مافكرة الفلوس بقت قديمة.

في التقرير ده هنعرفك أنواع الهدايا المناسبة للولاد، والبنات اللي داخلين الجامعة.

هدايا البنات:

الشوكولاتة والورد

البنات بتحب الهدايا اللي ليها معنى، وطبعا مفيش حاجة هتفرحهم زي الشوكولاتة والورد.

ساعة

تعتبر الساعات من أهم الاكسسورات اللي بتفضلها البنت، واللي هتستفيد بيها وهي في الكلية.

مكياج

بعد الثانوية كتير من البنات بيشتروا مكياج كتير وبيكون غالي، ممكن جدا تساعديها  في بعض أدوات المكياج، بس لازم تكون ماركة كويسة.

شنطة

ممكن نشتريلها شنطة لونها محايد «الأسود أو الكافية»، وناخد بالنا أنها ماتبقاش صغيرة أوي؛ علشان البنت هتحتاجها في الكلية لزوم المكياج وكشكول المحاضرات، والذي منه.

البرفيوم

خد بالك هنا، إن البنت مش بتحب أي نوع برفيوم والسلام، لو إنت مش عارف هي بتحب نوع محدد، تقدر تشتريلها «إسبري أو بادي سبلاش»، من «فيكتوريا سيكرت»، وهي أكيد هتفرح بيهم جدا.

هدايا الولاد:

لو بتفكر تجيب هدية لطالب بمناسبة نجاحه، فلازم تفكر بشكل عملي أكتر، تعالى أقولك إزاي.

بلاي ستيشن

ممكن تشتري للولد «بلاي ستيشن»، اللي تعتبر من أكتر الحاجات اللي كلهم بيحبوها، وبيستمتعوا بوقتهم فيها.

ماكينة حلاقة

معروف إن فترة الجامعة من أهم الفترات في حياة الشباب، واللي بيكون مهتم فيها بمظهره أكتر، علشان كده ماكينة الحلاقة هتوفر عليه وقت وفلوس كتير في إنه يظهر بشكل يحبه في وسط مجتمع الجامعة.

رحلة

بعد ضغط الامتحانات، بيحتاج الطلبة للراحة النفسية، علشان يتأهلوا لمرحلة جديدة في حياتهم،  والسفر هيكون من أنسب الهدايا، اللي هتساعده علشان يفصل من الضغط ويستمتع بوقته.

مجموعة من الكتب

اختيار مجموعة من الكتب المتميزة، علشان تساعده في تأهيله لاستقبال مرحلة الجامعة بكل التناقضات اللي فيها، وخصوصا لو عارف إنه بيحب القراءة.

شنطة رجالي

تعتبر الشنط «الكروس» الرجالي من أنسب الهدايا للشباب اللي داخلين الجامعة، واللي هتساعده يحتفظ بممتلكاته الشخصية؛ زي النضارة والمحفظة وكارنية الكلية.




3
8
4
2
0
0
1

شارك المقال


طالبة بكلية الإعلام في جامعة القاهرة، وتكتب في موقع شبابيك