رئيس التحرير أحمد متولي
 تعالى الشرقية.. هتستمتع وتنبسط بـ30 موقع ثقافي لحد شنبارة الميمونة

تعالى الشرقية.. هتستمتع وتنبسط بـ30 موقع ثقافي لحد شنبارة الميمونة

لو أنت في محافظة الشرقية أو هتزورها قريب يبقى يا بختك! في التقرير ده هعرفك على حوالي 30 موقع ثقافي وفني موجودين في المحافظة. والمواقع دي عبارة عن قصور وبيوت ثقافية ومكتبات وكمان سينمات. وقبل ما تسأل نفسك أيه الفرق بين القصر والبيت؟ هجاوبك إن القصر بيضم أنشطة وعروض كتيرة لكن البيت بيكون محدود في الفنون اللي بيقدمها.

نبدأ كلامنا بقى عن القصور اللي بتقدم أنشطة وعروض مسرحية بشكل دايم، وبخصوص العروض عايزة أقولك أن المسرح في الشرقية بيضم 3 شرايح من الفرق اللي بتقدم عروض مسرحية سواء داخل القصر أو في المحافظات المختلفة.

يعني فيه «الفرقة القومية» ودي تضم ممثلين وممثلات محترفين، وفيه «فرقة قصر الثقافة»، و«مجموعة فرق النوادي»، والفرقتين دول موجود فيهم ممثلين هواة ومعظمهم من طلبة جامعة الزقازيق ومن القصور اللي تقدر تشوف فيها عروض فرق «قصر ثقافة الزقازيق»، و«قصر ثقافة العاشر من رمضان»، و«قصر ثقافة بلبيس»، وكمان «قصر منيا القمح».

وفيه برضه «قصر ثقافة فاقوس»، و«قصر ثقافة أبو كبير»، و«قصر ثقافة ديرب نجم». وعنواين القصور دي معروفة جدًا يعني لو سألت فين القصر الفلاني ألف مين يدلك.

ومش بس بيتعرض في القصر عروض مسرحية لأ ده كمان فيه فرق فنية شهيرة في الشرقية بتعرض حفلاتها الغنائية والموسيقية هناك؛ زي فرقة «محمد عبد الوهاب للموسيقى»، وفرقة «منيا القمح للموسيقى العربية»، وكمان فرقة «الفنون الشعبية» والفرقة دي تعتبر من الفرق العالمية اللي مش بس بتعرض في المحافظات لأ دي كمان بتسافر لدول مختلفة يعني في العيد اللي فات كانوا بيعرضوا في بولندا. وفيه جوا كل قصر مكتبة لو حابب أنك تقرا أي كتاب أو رواية هتلاقيها فيها.

نتيجة بحث الصور عن فرقة الفنون الشعبية بمحافظة الشرقية

أنا كدة عرّفتك على القصور، وبالنسبة بقى للبيوت الثقافية فهتلاقي على سبيل المثال لا الحصر «بيت ثقافة الإبراهيمية»، و«بيت ثقافة شنبارة الميمونة». وبرضه عناوين البيوت معروفة مش هتوه متقلقش.

نيجي بقى للسينمات، هتلاقي عندك سينما عرابي اللي موجودة في نادي اسمه «أحمد عرابي» وده عنوانه حي الزهور تقسيم المعلمين، وفيه كمان سينما موجودة في «نادي المصرية بلازا» في منطقة القومية. وكمان فيه «سينما الأسرة» ودي موجودة في ميدان محافظة الشرقية.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»