رئيس التحرير أحمد متولي
 10 قرارات هتقلب الجامعة وتبسط الحبيبة

10 قرارات هتقلب الجامعة وتبسط الحبيبة

في خطوبات كتير بقت بتحصل في الجامعة بقالها فترة،  واحد بيحب واحدة وعايز يرتبط بيها قوم إيه يعملها مفاجأة في الجامعة في وسط فرحة أصحابهم والورود مليا المكان حواليهم.

طيب.. تفتكروا ايه القرارات اللي ممكن ياخدها رؤساء الجامعة  تجاه الحدث السعيد ده،  تعالوا بقى نتخيل كدة شكل الجامعة هيكون عامل ازاي :D

قرار رقم 1

بناء  قاعة أفراح  اسمها «صهللة» وديه بقى هتساع من الحبايب ألف والأكل فيها هيكون عبارة عن كراتين عليها لوجو كافيتريا الجامعة وفيها سندوتشين وحتة جواه وعصير .

قاعة صهللة

قرار رقم 2

بناء محل اسمه «العروسة للعريس والجري للمتعايس» وده هيكون فيه جهاز العريس والعروسة كله من الإبرة للصاروخ.

قرار رقم 3

هيكون فيه كوافير «فلة»  وده هيطلع البنت سعاد حسني وحلاق«البرنس» وده هيطلع الولد عمر الشريف.

حلاق البرنس

قرار رقم 4

مكتب «مهرجانات التيتا في النانا» وده بقى هيروحوا العريس والعروسة عشان يتفقوا على الفقرات اللي هتبقى موجودة في فرحهم.

قرار رقم 5

«شئون المحبوبين» وديه بقى لو حصل مشكلة بين الولد والبنت هيروحوا للشئون ديه تحللهم مشاكلهم.

قرار رقم 6

«مديحة أفراح» الست مديحة ديه بقى اللي بتشرف على تنظيم الفرح وديه هيكون ليها مكتب جمب القاعة عشان العروسين يسألوها هيرتبوا إزاي القاعة.

قرار رقم 7

«حمام الهنا» للبنات و«حمام زيزو» للولاد  ودول بقى عشان العريس  والعروسة يبقوا فلة شمعة منورة.

حمام زيزو

قرار رقم 8

«مأذون جامعتنا» هيكون فيه منه كتير في الجامعة وعشان يكسبوا زباين بسرعة كل واحد منهم هيمشي في الجامعة وينادي مأذون يا منى مأذون يا حمادة.

قرار رقم 9

«حضانة حبنا» ديه بقى بعد ما العروسين يخلفوا يبقوا يودوا ولادهم الحضانة ديه عشان يتعلموا معنى الحب من المكان اللي جمعهم سوا.

قرار رقم 10

«صور وحودايت» وده هيكون ركن فيه صور كل محبوب ومحبوبة وكل شهر كل اتنين منهم هيجمعوا أصحابهم ويحكوا ازاي هما اتجمعوا.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»