كتير مننا مضطر إنه يستنى صحابه أو ينتظر في الشارع في عز الحر، وعشان الموضوع ده صعب تتحمله في رمضان؛ هنقولك على حيل ونصايح بسيطة تقدر تتغلب بيها على الحر.

تكييف في الشارع

وانت في الشارع ومستني حد صاحبك أو مواصلاتك هتتأخر في رمضان، فانت ممكن تستغل فروع شركات الاتصالات والبنوك اللي موجودة في الشارع في إنك تقعد فيها لحد ما ربنا يكرمك وصاحبك يوصل بالسلامة.

هتدخل وتاخد رقم من الفرع وتستنى دورك، ولما جسمك يرتاح من الحر هتدي رقمك لحد كبير في السن عشان ميستناش كتير ويخلص مصلحته بسرعة، وكده تبقى ريحت نفسك وعملت خير كمان.

المساجد

المساجد اللي في الشارع برضو ممكن تستغلها في إنك ترتاح في التكييف وكمان ممكن تقرأ قرآن أو تذكر ربنا، وبكده ترتاح وتاخد ثواب.

متمسحش العرق

كتير مننا ميعرفش إن جسمنا في تكييف طبيعي، والمفروض إنك متمسحش العرق؛ لأنه بيساهم في تخفيض درجة حرارة الجسم بشكل كبير، يعني لو اتبخر كمية لتر من ماء العرق على سطح الجلد فده كفيل بتخليص الجسم من كمية بتبلغ حوالي 600 سعر حراري من الطاقة الحرارية.

مناديل مبللة

دايما خلي معاك مناديل مبللة في الحر في رمضان، لأنها هتساعدك ترطب جسمك من غير ما تقفل التكييف اللي في جسمك اللي قولنا عليه فوق، وكمان هتتخلص من ريحة العرق المزعجة.




0
0
0
0
0
0
0