رئيس التحرير أحمد متولي
 إزاي «تتشيك شتوي» على قد فلوسك؟

إزاي «تتشيك شتوي» على قد فلوسك؟

الشتا بيرتبط عند الناس دايماً باللبس الشيك، وميزانيته عادة بتبقى كبيرة وشايلين همها من الشتا اللي قبله.

احنا هنقدملك بعض الافكار اللي هيساعدنا فيها "مدحت رمضان" المتخصص في مجال الملابس وهنوصل للشكل المطلوب بأقل التكاليف.

عكس الفصول

ممكن تعكس فصولك في اللبس، يعني تشتري هدوم الشتا في أول الصيف والعكس، هتستفيد من الخصومات اللي بتقدمها المحلات وبتوصل أحياناً 50%، يعني ممكن تجيب الجاكيت اللي سعره في الشتا 500جنيه بـ 250 أو 300 جنيه بالكتير ده غير فيه حاجات هتبقى أرخص من كده بكتير.

دفا ولا مظهر

أولاً لازم تختار انت عايز أيه من لبسك الشتوي؟، الدفا والشياكة مع بعض هيكلفوك جداً، لأن اللبس اللي شكله كويس وخامته حلوة بيبقى غالي جداً.

انت هتشتري اللبس الخارجي يكون شيك وحلو، وتروح على الملابس الرخيصة وتشتري لبس منها اللبس التقيل، وتلبسه تحت الهدوم الغالية اللي انت جبتها.

مش بالمكان ولا الشكل

احنا دول مفيهاش صناعة ملابس وغالباً كل حاجتنا مستوردة، يعني كل المحلات تقريباً بتجيب نفس اللبس ونفس الموديلات والماركات.

المحلات الأماكن الراقية بتضطر ترفع في السعر عشان تعوض فرق الإيجار والمصاريف، لكن هتلاقي نفس حاجته عند حد تاني بأسعار أقل بكتير لكن في منطقة تانية، تكون معقولة وعشان تكون مقتنع جرب تتفرج في أكتر من مكان قبل ما تشتري.

المحلات المتكاملة

فيه بعض المحلات زي التوحيد والنور أو الهدى والنور بتقدم ملابس شتوية بأسعار معقولة جداً، شكلها أي نعم مش هيبقى حلو لكنها بتأدي الغرض وتضمن إنك تشتري كل حاجة بتمنها.

العروض

استنى شوية في أول الشتا ومتستعجلش وانت بتشتري هدومك، بعد أول شهر أو اتنين بتبدأ الأسعار تنزل، والأهم إن المحلات بتعمل عروض على مبيعاتها وبتخفض الأسعار على القطع مع بعضها بخلاف انك تشتري قطعة واحدة.

محمد أبو عقيل

محمد أبو عقيل

صحفي مصري يكتب في الملف الثقافي والرياضة