رئيس التحرير أحمد متولي
 مظاهر الاحتفال بالعيد في سينما زمان ودلوقتي

مظاهر الاحتفال بالعيد في سينما زمان ودلوقتي

اختلفت مظاهر الاحتفال بالعيد في الأفلام القديمة عنها في أفلامنا الحالية، بالرغم من إن في ثوابت عند المصريين في احتفالهم بالعيد زي أكل اللحمة في عيد الأضحى و"الكحك" في عيد الفطر إلا إن الفرحة وباقى أشكال الإحتفال اتطورت.

الأفلام القديمة

فيلم دنيانير - 1939 - أم كلثوم

الفيلم بطولة يحيى شاهين وأم كلثوم، فيه غنت أم كلثوم "يا ليلة العيد" وكانت بداية لانتشارها لدرجة وصلت أم كلثوم إنها تطلب حذف الأغنية من الفيلم علشان تغنيها في حفلاتها وبس، وعبرت الأغنية عن أجواء الفرحة في العيد وخاصة" ليلة الوقفة".

أبو حلموس - 1947- نجيب الريحاني

قصة الفيلم بتتكلم عن "خروف العيد" و "شحاتة أفندي" اللي كان مسئول عن حسابات ثمن أكله وتنظيفه وكان بيزور في الحسابات ويختلس فلوس على حساب "خروف العيد"، الفيلم بطولة نجيب الريحاني، زوزو شكيب و عباس فارس.

ليلة العيد - 1949- شادية

​​​​​​​كانت بداية الفيلم أغنية "الليلة عيد" وعرض للمولد، الفيلم بطولة "شادية، شكوكو وإسماعيل ياسين".

في بيتنا رجل - 1961 - عمر الشريف

أحداث الفيلم بتحكي عن المقاومة الشعبية في وقت الإحتلال في شهر رمضان والتجهيز للإحتفال بالعيد، وبتظهر في الفيلم مظاهر إحتفال الأسر المصرية بفترة الصوم وتجهيزها للعيد حتى وسط الأحداث الصعبة، الفيلم بطولة "عمر الشريف، حسن يوسف، زبيدة ثروت وزهرة العلا".

الزوجة الثانية - 1967- سعاد حسني 

في الفيلم بنشوف عادة تجهيز "الكحك" و"الخبيز" في الريف وعمل النساء على تجهيز كل أنواع الطعام، الفيلم بطولة سعاد حسني، شكري سرحان وصلاح منصور.

ناصر 56 - 1996 - أحمد ذكي

الفيلم تناول جانب الرؤساء في الإحتفال بالعيد مع عائلتهم "مشهد جمال عبد الناصر وتوزيع العيديات على أبناءه"، الفيلم بطولة أحمد ذكي.

الأفلام الجديدة

همام في أمستردام - 1999- محمد هنيدي

الفيلم كان ضمن فيه طقوس الأسرة المصرية في الاحتفال بالعيد من أول صلاة العيد وحتى التجمعات الأسرية للإحتفال و" فطار العيد"، الفيلم بطولة "محمد هنيدي وأحمد السقا".

بوحة - 2005- محمد سعد

بيحكي الفيلم عن معاناة "محمد سعد " وبحثه عن حقه وعمله في الطريق للبحث كـ"جزار" بيدور على البيوت اللي محتاجة تدبح وبيدبح لهم هو رغم عدم معرفته أي معلومات عن طرق الذبح ، الفيلم كان كوميدي لكنه وضح وسط الأحداث إستغلال تجار المواشي وأصول الدبح السليمة، الفيلم بطولة محمد سعد، مي عز الدين، لبلبة وحسن حسني.

ألوان السما السبعة -2007-فارق الفيشاوي

وسط الفيلم بنلاقي مشاهد عن إحتفال الحبيبين " ليلى علوى وفاروق الفيشاوي" في وقت العيد من زيارة للموالد وخروج في الأماكن العامة و" الجناين" ولعب الأطفال.

تيمور وشفيقة -2007- منى ذكي وأحمد السقا

الفيلم فيه مشاهد بتحكي عن الأسرة المصرية والتجهيز للعيد، مشاركات الجيران لبعضهم و الهدايا بين الحبيبين، الفيلم بطولة "منى ذكي، أحمد السقا، رجاء الجداوي وهالة فاخر.

عسل إسود - 2010-أحمد حلمي

الفيلم فيه مواقف عن العيدية ولمة العيلة والعادات المصرية المختلفة عن أي عادات ممكن تحصل بره مصر، بطولة"أحمد حلمي، إدوارد، إيمي سمير غانم ولطفي لبيب".            

روزانا ناجح

روزانا ناجح

حاصلة على كلية الإعلام من جامعة القاهرة