للبنات.. الخلاصة في ركوب العجل مع GO BIKE وهبة خيري
الحياة حلوة.. والأحلى انك تعملي فيها اللي تحبيه، زي مثلا هبه خيري اللي قررت متحرمش نفسها من إحساس الطياران فوق عجلتها والهوا المنعش يستقبلها، ومفكرتش كتير في الناس وكلامهم، فكرت بس في اللي بتحبه، وعشان كده سألناها لو في بنات نفسها تجرب نفس الإحساس ده تبدأ منين وتعمل ايه؟
البداية كانت من المصيف
دايما من طفولتي كنت بحب اركب عجل، و فى الإجازة كنت باخد عجلتي وانزل العب بيها وفي المصيف أول حاجة كنت بحب اعملها إني اركب عجلة، وكنت بحس انى طايرة والهوا فى وشى ودي حاجة كانت بتخليني افصل عن الدنيا كلها.
وبعد ما كبرت وشفت المجتمع ونظرته للبنت اللي بتركب عجل اترددت شوية إني أخد قرار ركوب العجل، وبالصدفة دخلت على face book لقيت جروب GO BIKE بالصدفة اكتشفت انهم مجموعه شباب بينزلوا كل يوم جمعة بالعجل هدفهم نشر ثقافه العجل نزلت معاهم و حبيت التجربة جدا و بقيت انزل كل جمعة وهما كانو بيوفروا عجل للناس اللى معندهاش وده مقابل اجر رمزي لحد ما فى مره اخدت قرار اني لازم اشتري عجلة واخدت حريتي فى انى امارس حاجة بحبها وعايزها وبقيت بشاركهم كل الإيفنتات.
العجلة ممكن تفيد البنت إزاي؟
- العجلة مش بس رياضة دي وسيلة مواصلات هايلة وتنفع جدا للبنات والولاد جدا لإنها بتحتاجش بنزين وبتقوي عضلات الجسم
- مناسبة جدا للسفر ففي فريق go bike عملنا رحلات بالعجلة لبني سويف والمنوفية
- ممكن تغنيكي عن الدايت فلو محتاجة تخسي فركوب العجلة لمدة 45:30 دقيقة بتحرق حوالي 700:500 سعر حراري
- التركيز في سواقة العجل بيقلل الإجهاد والتعب وبيساعد على النوم وبتزود قدرة الدماغ وبتحمي من مرض الزهايمر وأمراض القلب
إزاي تشتري عجلة؟
- اختيار العجلة بيكون على حسب الإستخدام اذا كان للشغل او للترفية يعني لو مثلا هدفك تنزلي وزنك فلأحسن العجلة road عشان خفيفة في الوزن ومخصصة للطرق السريعة والمسافات الطويلة بس عيبها إنها قليلة التحمل
- اما الـ al mountain عجلة قوية التحمل تمتاز بوجود مساعدين امامي ووسطي لإمتصاص الصدمات ومخصصة للمناطق الجبلية والمنحدرات هى بطيئة من حيث السرعة مقارنه بالأنواع التانية و تيقلة في الوزن
- في برضو الـhyper هى بين المونت والـ road بتمتاز بسرعتها وخفه وزنها وقوه تحملها
أما عن أنواع العجل الموجودة في مصر فهي جاينت .. اوربيا .. ترك .. بيانكى .. سكوت وبتتراوح أسعارهم من 3000 الى 7000 جنيه
أما عن الرخيص فهم ترينكس .. تبرو .. موست ..فيفا .. نكسس .. توتام .. سلكانودول بيبدأوا من 1000 الى 3000 جنيه
وأشهر محلات بيع العجل في مصر هم: بسكلته ، EURO BIKE ..ابو الجوخ .. cairo bike.. WHEELS EGYPT ,
قواعد ركوب العجل
للمبتدئين ممكن تتعلم فى مكان فاضي كل يوم مثلا لمدة نص ساعة لحد متتعودي عليها ويفضل ان الإيد والركبة يكونوا متنين شوية ونتأكد من إن إرتفاع الكرسي يكون مناسب.
بالنسبة للبس المناسب للعجلة بنطلون ضيق من تحت ولبس يغطى الجسم من الخلف وفي شوية إكسسوارات لازم تكون معاها زي الخوذة والجوانتي والنور الخلفي والأمامي
إشارات مرورية لازم تعرفيها
- قف : رفع قبضة اليد اليمنى إلى أعلى
- انعطف يمينا : تكون بالاشاره بالذراع اليمنى فى مستوى الكتف
- انعطف يسارا : تكون برفع اليد اليسرى على استقامتها فى مستوى الكتف
- احذر : " للتحذير من حفرة ، بلاعه ، حجر " اشارة بسبابه ذراعك اليسرى وتشير على الخطر والعكس ناحبه اليمين
- هدىء السرعه : تكون بفرد الذراع لأسفل وتحريك كف اليد صعودا وهبوطا
- وكنصيحة أخيرة لو اتعرضتي لأي مضايقات أو سخافات في الشارع فالأحسن أنك تتجاهليها تماما وكأنهم مش موجودين أما للحيوانات زي الكلاب مثلا الأحسن لتجنبهم التوقف بالعجلة وعدم الجري
وللبنات اللي حابة تتعلم ركوب العجل ممكن تتواصل مع مدرسة go bike لتعليم ركوب الدراجات يوميا من الساعة 10 صباحا حتى الساعة 4 مساء على رقم 01026013344
