موضتك عندنا.. جواكيت شتاء 2015-2016

لأن في «شبابيك» دايمًا بنهتم بكل تفاصيل حياتكوا، وطبعًا اللبس جزء لا يتجزأ منها، نزلنا ودورنا في أماكن مختلفة على موضة "جواكيت الشتا" السنة دي، وجبناها لحد عندكوا في التقرير ده..

أولاً.. الجلد

الجواكيت الجلد دايمًا بيكون ليها نصيب الأسد في الشتا، بس السنة دي الموضة فيها مختلفة، فهنلاقي فيه الجاكيت الجلد القصير اللي بفرو من عند الرقبة أو السادة أو المطرز.

أفضل لون: اللون الأسود هو الغالب فيه، وده هيكون مناسب لكل الأجسام وهيدي ليها رونق خاص.

هتلاقيها فين: لو انتي قريبة من مدينة نصر هتلاقيه في محل "شعبان" جنب بيت الدونتس، منطقة عباس العقاد، وهيكون سعره 125 جنيه.

لو انتي قريبة من وسط البلد هتلاقيه في محل "ماركاتو" على الشارع الرئيسي لوكالة البلح، بعد شركة الكهرباء، وسعره بيبدأ من 250 جنيه ل 280 جنيه.

أفضل سعر: محل "شعبان" بجوار بيت الدونتس، منطقة عباس العقاد وهيكون سعره 125 جنيه.

 ثانيًا.. التريكو

التريكو يمكن مكنش منتشر في موضة شتا السنة اللي فاتت، بس السنة دي بقى موضة، وموجود في أماكن كتيرة بأشكال مختلفة، سواء كارديجان بكابيشو أو جاكيت.

أفضل لون: الألوان الفاتحة هي الغالبة في التريكو، وده هيكون مناسب لكل اللي بيحبوا الألوان الفاتحة في الشتا.

هتلاقيها فين: لو انتي قريبة من وسط البلد هتلاقيه في محل "أبناء علي أبو اليسير" على الشارع الرئيسي لوكالة البلح، وسعره 75 جنيه.

لو انتي قريبة من منطقة حدايق المعادي هتلاقيه في محل "ميس إيمي" أمام محطة حدائق المعادي، بشارع المصنع على الشمال بـ35 جنيه، وفي محل "مودي فاشون" في شارع المصنع بحدائق المعادي وسعره 45 جنيه.

أفضل سعر: محل "ميس إيمي" أمام محطة حدائق المعادي بشارع المصنع على الشمال بـ35 جنيه.

ثالثاً الكيمونو:

الكيمونو كان منتشر في الصيف بشكل كبير، ولأنه بقى ليه شهرة واسعة، فده خلاه موضة موجودة معانا في الشتا السنة دي، بس بخامات وأشكال مختلفة تناسب الشتا، فهنلاقي الكومونو بخامة "موهير" والكيمونو بكمام وطويل لحد القدم والكيمونو القطيفة.

أفضل لون: الألوان الغامقة السادة ومشجرة هتكون مناسبة لفصل الشتا، وهتحسسك بالدفا، زي مثلًا اللون النبيتي واللون البني واللون الأزرق، وغيرها من الألوان الغامقة، فقدامك تختاري ما بين اللون السادة أو المشجر.

هتلاقيها فين: لو قريب منك أي فرع "كارينا" هتلاقي الكيمونو الطويل بـ210 جنيه.. لو انتي قريبة من وسط البلد هتلاقي الكيمونو الموهير موجود في محل "لوباليه" بشارع طلعت حرب وسط البلد بـ255 جنيه.. ولو انتي قريبة من حدائق المعادي هتلاقي الكيمونو القطيفة موجود في محل "فله" قدام محطة مترو حدائق المعادي أول شارع المصنع بـ85 جنيه.

أفضل سعر: الكيمونو القطيفة 85 جنيه في محل "فله" قدام محطة مترو حدائق المعادي أول شارع المصنع.

رابعًا الفرو:

بيسموه الـ "fake fourier"، وده لأنه مش فرو أصلي، بس جودته كويسة والجاكيت الفرو الكات موجود معانا في موضة السنة دي، ومش بس فرو ده كمان فيه جاكيت ريش نعام كات، وكمان فيه جيليهات قصيرة.

أفضل لون: اللون البني والبيجات والنبيتي والأسود.

هتلاقيها فين: لو انتي قريبة من وسط البلد هتلاقيه في  سنتر "الحرم الشريف" في بداية وكالة البلح وسعره 150 جنيه، وفي محل "لوباليه" في شارع طلعت حرب بـنفس السعر.

أفضل سعر: الأسعار واحدة تقريبًا ومعقولة جدًا للجاكيت الفرو الكات، مقارنة بأسعاره في شتا السنة اللي فاتت،  كانت في حدود 300 جنيه. خامسًا البليزر:

البليزرات على الرغم أنها موجودة في فصل الصيف كتير، إلا أنها مكملة معانا في الشتا السنة دي؛ لأنها بقت موضة بكل أشكالها، سواء مشجرة أو سادة.

أفضل لون: المشجر والسادة

هتلاقيها فين: لو انتي قريبة من مدينة نصر هتلاقيها في محل "أوت ليت" في أول عباس العقاد، وسعره بيبدأ من 195 إلى 225 جنيه. أفضل سعر: الأسعار مناسبة للي حَبة تشتري بليزر مشجر أو سادة؛ لأنك ممكن تلاقيها في أماكن تانية بـ300 جنيه مثلًا. سادسًا الصوف الصوف الشتا السنة دي مش نازل سادة بس لأ ده نازل منه جواكيت صوف منقوشة برسومات مختلفة سواء فراشات أو خطوط.

أفضل لون: الألوان الغامقة في ألوان فاتحة زي الأسود في رمادي، أو النبيتي في بيج، وغيرها من الألوان، ودي طبعًا بتناسب كل الأجسام وعلى حسب ذوقك تقدري تختاري اللون اللي انتي عايزاه.

هتلاقيها فين: لو انتي قريبة من مدينة نصر هتلاقيها في محل "شعبان" جنب "بيت الدونتس" في عباس العقاد بـ110 جنيه.

أفضل سعر: 110 جنيه ده أفضل سعر بالنسبة لجاكيت صوف، لأن لو روحنا سألنا على جواكيت صوف في أي براندات هنلاقي أسعارها في حدود الـ300 جنيه.