رئيس التحرير أحمد متولي
 متبقيش مكلكعة.. «طقم الدفاية» شياكة وتوفير

متبقيش مكلكعة.. «طقم الدفاية» شياكة وتوفير

الحيرة المعتادة في خروجة البنات هي "هلبس إيه النهاردة".. لكن فصل الشتاء بالتحديد الحيرة فيه بتزيد "عايزة أدفى وألبس شيك".. من غير ما يكون مجموع الحاجات اللي هنلبسهل فوق الـ5 حاجات.. معادلة صعبة بين اللبس الكتير اللي بيدفي والأناقة.. بس سهل تحقيقها

عايزة تعرفي إزاي تدفي نفسك من غير "كلكعة".. «شبابيك»  هيقولك.. 

المشكلة

الهوا الساقع إللي بتبقي مش عارفة حاسه بيه إزاي بيجبرك تلبيسي 2 بادي من تحت وبعدين شميز أو بلوزة.. وبعدها بلوفر وفوق كل ده جاكت.. وطبعا كله فوق بعضه بيكلكع.. و شكلنا في النهاية غير متناسيقين وبعاد عن الأناقة والشياكة تمامًا.

الطقم الدفاية

الطقم الدفاية.. في الأغلب بيكون في محلات الهدوم الداخلية ومحلات الملابس البيتي.. لو سألتي عن الطقم الدفاية ممكن ناس كتير متعرفهوش هو عبارة عن تيشيرت ضيق قماشتة صوف ناعم متبطن بالقطن.. والبنطلون نفس الخامة صوف إما قماش أو تريكو.

لو مش قريب ليكي أي محل لملابس البيت ممكن تلاقي الطقم الدفاية في منتجات "كارينا، قطونيل".. وأسعارهم حسب كل ماركة تبدأ من 125 جنيه.

لو ملقتيش الطقم الدفاية.. عارفة هتعملي إيه؟؟

بصي إحنا شعب بتاع افتكاسات.. ممكن تصممي لنفسك طقم الدفاية وكمان توفري فلوس.. كل اللي عليكي اتباع الخطوات الجاية..

التيشيرت

تيشيرتات كتير اسمها "under shirt " بتكون قطن و صوف تباع من منتجات "كارينا، أوليف، قطونيل".. أو في محلات الملابس العادية الموجودة في أغلب الأحياء السكنية تحت اسم "محلات التصدير".. وأشهر المحلات ديه موجودة في وسط البلد شارع 26 يوليو، والمعادي في شارع المصنع، وأول عباس في محلات شعبان و outlet، سعرها هيبدأ من 35 جنيه لحد 75 جنيه حسب الخامة ولو كانت ماركة أو حسب المكان اللي  هتشتري منه.

البنطلونات

فيه كتير من محلات بيع الطرح ومستلزمات الحجاب ممكن نشتري بنطلون الليجن الصوف سعره هيبدأ من 65 جنيه.. أو من سلسلة محلات كارينا متوفر فيها البنطلونات الصوف التقيل والصوف الخفيف سعرها 95 جنيه.

مجموع التيشيرت والبنطلون (35+65=100جنيه).. يعني أنتي وفرتي 25 جنيها و أكتر كمان لو فاصلتي و انتي وشطارتك.

ضي جمال

ضي جمال

صحفية متخصصة في ملف المرأة والأدب والثقافة