رئيس التحرير أحمد متولي
 3 أماكن تبيعلك «الجينز» رخيص

3 أماكن تبيعلك «الجينز» رخيص

  عايز تشتري بنطلون جينز من غير ما الميزانية تخرم منك .. "شبابيك" هيقدملك في التقرير ده أرخص أماكن لبيع بنطلونات الجينز والقماش بأجود الخامات والماركات.   الوكالة   وكالة البلح بتضم عدد كبير جدا من محلات الملابس الجاهزة، وعدد من الباعة أصحاب البالات - المعروضة على استندات في الشارع- إللي بيعرضوا ملابس بواقي تصدير بأسعار مخفضة جدًا، ومن أبرز الملابس ديه البنطلونات بكل أنواعها وخامتها.   البنطلونات الجينز أسعارها تبدأ من 75 جنيه، الليجن الصوف القماش بـ 35جنيه، والصوف التريكو 65جنيه.   الوكالة موجودة في وسط البلد محطة الإسعاف، تبدأ من أول شركة الكهرباء والقنصلية الإيطالية لحد أخر الشارع تحت كوبري أكتوبر، لو عايز تروحها ممكن تركب المترو وتنزل محطة "جمال عبد الناصر"، وأسأل هيدلوك كتير.   شارع ضياء   بداية الشارع لحد أخره محلات متخصصة في عرض كل أشكال وأنواع بنطلونات الجينز المختلفة من أول البنطلونات الجينز الهاي ويست والـslamو اللو ويست حتى بنطولنات موضة 2016 المحجرة، وأسعارها تبدأ من 55جنيه، و65 جنيه لحد 150جنيه، حسب الماركة واللون والشكل.   شارع ضياء متفرع من شارع فيصل الرئيسي بين منطقتي الطوابق والطلبية، لو عايز تروح الشارع أركب أي عربية رايحة شارع فيصل وإنزل شارع ضياء هو معروف جداا.   كارينا   معروف عن سلسلة محلات كارينا إنها متخصصة في لبس المحجبات فقط، لكن الواقع إن كارينا بيعرض أقسام مختلفة من لبس الخروج واللبس البيتي للولاد والبنات بأسعار متوسطة، ومن أكتر الأقسام المتميزة فيها كارينا البنطلونات بكل أنواعها الجينز والقماش والقطن والصوف   أسعارها تختلف حسب خامة البنطلون، الجينز سعره 150 جنيه وده لكل الجينز الأستيك و الهاي ويست أو لو ويست أو محجر أو slam، القطن بداية من 55جنيه حسب إستايل البنطلون، الصوف القماش 65 جنيه، والتريكو 95جنيه.

ضي جمال

ضي جمال

صحفية متخصصة في ملف المرأة والأدب والثقافة