رئيس التحرير أحمد متولي
 كيف تكتب cv نموذجيا؟

كيف تكتب cv نموذجيا؟

الـ cv أول حاجة بتعتبر عنك لما تبعته لشركة ،عشان كدا لازم تهتم بيه جدا وتتجنب الأخطاء الشائعة اللي ممكن تخلي حد أول ما يبص على "السي في" بتاعك يرفضه

"السي في" ليفضل يكون مركز ومختصر وميزيدش عن صفحتين لو أنت حديث التخرج ومعندكش خبرات تملاه بيها.

أولا: بتكتب بياناتك الشخصية

-عنوانك و بلاش تكتبه تفصيلي اكتب بس المنطقة و المدينة و المحافظة و متكتبش الدولة الا لو بتقدم على وظيفة برة او منحة خارجية لأن الغرض من العنوان ان  يتعرف بس انت مكانك فين هتكون قريب للشركة ولا لأ.

-إيميلك و دة لازم ولا بد يكون حاجة بروفيشنال  بلاش أسامي الدلع ،يعني يكون فيه اسمك و اسم العائلة فقط

-ياريت يكون عندك لينكد ان و تحطه تحت الميل بالظبط و ياريت تكون مظبطه و حاطت فيه كل بياناتك مظبوطة و تكون شخصية اجتماعية عليه ويكون اللينك بتاعه اللي هتحطه مبسط مش معقد

ثانيا : مهم أوي بعد بياناتك الشخصية ،تكتب objective  أو هدفك، دا الي هتعرف الناس من خلاله أنت بتدور علي شغل ايه بالزبط أو عايز تكون ايه معاهم، دا مهم لأن الشخص الي مش محدد هو عايز ايه في السي في بيدي انطباع سيء للشركات

ثالثا : تعليمك وخبراتك

-السي في ليه طرق كتير يتكتب بيه، عشان كدا في حاجات مختلف عليها..

ناس بيقولوا انك مينفعش تكتب تعليمك أول حاجة لأن "الاتش ار" و هو بيقرا السي في عايز يشوف حاجة تخليه يكمل السي في حاجة تخليه يحس انك مميز عن بقيت الناس اللي كاتبين انهم خريجين كذا بتقدير كذا لأن فيه الف غيرك كاتبين كدة.

ناس تانية شايفين أن عادي انك تكتب تعليمك اول حاجة لأنك بتعرفه انت خريج ايه معاك شهادة ايه من ايه، الطريقتين موجودين والطريقتين صح اختار الي يعجبك.

الخبرات : تكتبها في شكل عناوين وتحت كل عنوان تفاصيل العنوان دا في شكل نقاط

أخطاء قاتلة في السي في:

في شوية أخطاء كدا ،لو اللي بيقرأ السي في شافها غالبا مش هيكمله لاخره:

1- أخطاء الـ spelling ، دي هتدي الي بيقرا انطباع ان الشخص دا لغته ضعيفة .

2- متحطش صورتك ،الا لو دا مطلوب للوظيفة الي انت بتقدملها

3- انك تكتب References is available upon request، متكتبهاش

4-متستعملش ألوان غير الأسود للكتابة

5- أستعمل حجم خط 10 أو 12 مش أكبر ولا أصغر

6- متسميش الcv  بأسم  final cv  لازم تسميه بأسمك

 7- ترتيب الخبرات  يكون من الأحدث الي الأقدم

8- متكتبش هواياتك غير الي ممكن يكون ليها علاقة بالوظيفة

9-متكتبش اسم مدرستك لا الابتدائية ولا الثانوية

10-مهم تهتم بشكل وتنسيق السي في والمسافات بين الكلمات والسطور

11-متطولش أوي فيه ولا تختصره اختصار مخل ،يعني اكتب المختصر المفيد

هتلاقي نماذج ممكن تحملها وتختار منهم الي يعجبك وتملاه ببياناتك  هنا و هنا