للبنات.. اشتري طقمك الشتوي بـ500 جنيه
اللبس الشتوي ممكن يكون غالي ومبنعرفش نجيب طقم كامل لينا وبنضطر نجيب الحاجات اللي عايزينها على فترات وعشان خاطر تجيبوا الطقم اللي عايزينه مرة واحدة «شبايبك» دورت ليكوا على أماكن تجيبوا منها الطقم بتاعكوا ب500 جنيه بس.
الجينز
55جنيه ده سعر الجينز في شارع ضياء بمنطقة فيصل اللي موجود فيه أشكال وأنواع بنطلونات جينز مختلفة.
وصف المكان: شارع ضياء متفرع من شارع فيصل الرئيسي بين منطقتي الطوابق والطلبية، و أسهل مواصلة انك تركبي أي عربية رايحة شارع فيصل و تنزلي شارع ضياء.
و75 جنيه ده سعر الجينز في وكالة البلح اللي موجود فيها بنطلونات كتير بأنواع وخامات مختلفة.
وصف المكان: الوكالة موجودة في وسط البلد محطة الإسعاف، تبدأ من أول شركة الكهرباء و القنصلية الإيطالية لحد أخر الشارع تحت كوبري أكتوبر، لو عايز تروحها ممكن تركب المترو وتنزل محطة "جمال عبد الناصر" وأسأل هيدلوك كتير.
و150 جنيه ده سعر الجينز الأستيك أو الهاي ويست أو لو ويست أو محجر أو slem، في محلات كارينا اللي موجود فيه بنطلونات بكل أنواعها سواءجينز أو قماش أو قطن أو صوف.
وصف المكان: كارينا موجود في كذا فرع منهم فرع أول عباس العقاد و فرع جنينة مول.
البلوفر
155 جنيه ده سعر البلوفر التريكو في محل أوت ليت في أول عباس العقاد.
وصف المكان: بعد بنزينة عباس العقاد جمب محل أخر العنقود .
80 جنيه ده سعر البلوفر الموهير في محل ماركاتو بوكالة البلح.
وصف المكان: الشارع الرئيسي بعد شارع الكهرباء بوكالة البلح.
35 جنيه ده سعر الجاكيت التريكو في محل ميس ايمي بحدائق المعادي.
وصف المكان: أمام محطة مترو حدائق المعادي
الجاكيت
80 جنيه ده سعر الجاكيت التريكو في محل أبناء علي أبو اليسير في وكالة البلح.
وصف المكان: المحل على الشارع الرئيسي للوكالة، والوكالة في وسط البلد.
150 جنيه ده سعر الجاكيت الجلد الفرو الكات في محل لو باليه في طلعت حرب.
وصف المكان: شارع طلعت حرب وسط البلد.
110 جنيه ده سعر الجاكيت الصوف في محل شعبان.
وصف المكان:شارع عباس العقاد بجوار بيت الدونتس مدينة نصر
الجزمة
210 جنيه ده سعر البوت السيفتي الفلات في محل الفولي في وسط البلد.
وصف المكان: أمام دار القضاء العالي في وسط القاهرة بجوار محطة مترو جمال عبدالناصر.
235 جنيه ده كمان سعر بوت سيفتي في محل عشوش بوسط البلد.
وصف المكان: أمام مول طلعت حرب وسط البلد
220 جنيه ده سعر الهاف بوت الجلد في محل تاتاتيو
وصف المكان: محل تاتاتيو موجود في كذا فرع منه فرع أول عباس العقاد بجوار ثري ام
