ليه تخرج متعكنن؟.. 4 أشياء تغيّر مودك الصبح
كلنا بنصحى الصبح مغمضين ومش شايفين قدامنا، ولا فطار ولا غيره بننزل جري على وشنا عشان نلحق نروح الجامعة او الشغل، وطبعا مزاجنا بيبقى متعكنن، ولا بنتكلم ولا نتفاعل لحد نص اليوم لما المزاج يظبط، طب عمرك فكرت تغير مودك الصبح وتنزل مروق كده، اعرف ازاي تغير مودك الصبح وتروق وتهيص
- دش بارد
أول ما تصحى وقبل ما تعمل أي حاجة، افتح الدش وخد شاور ساقع يصحصحك ويبعد النوم عن عينيك، هتحس انك فوقت وانتعشت شوية كده، ده فيه دراسة أمريكية بتقولك أن الاستحمام بالمية الباردة بيحسن المزاج ويزود النشاط ويخلصك من الكسل قبل ما تروح شغلك أو مكان دراستك، يلا خد دشك ونعيما مقدما.
- فطار جديد
ممكن تكون مش بتفطر خالص قبل ما تنزل زي ناس كتير، وممكن تكون من الناس اللي بتمسك مج الكابتشينو والكرواسون وتفطر الصبح، غير نظام فطارك ده خالص، أقف على عربية فول وكل طبقين ولا رغيفين فول وطعمية، واتكلم بقى مع الناس والبياع واضحك وهزر وغير مودك ومودهم، او خد صاحبك وروحو اضربو كشري على الصبح، يا سيدي على الفطار والروقان!
- اسمع راديو
افتح الراديو الصبح، بس مش أي إذاعة وخلاص، إذاعة شبابية مفرفشة كده وبرامج تظبط مودك، يعني في عندك نجوم أف.إم (تردد 6 ,100) وميجا أف.إم (تردد 7, 92) وغيرهم، ده الأغنية الواحدة اللي بتسمعها الصبح ممكن تغير مودك طول اليوم، افتح راديو واسمع برنامج وشوية أغاني وغني معها وفرفش بقى.
- كلم شخص بتحبه
اشحن موبايلك كارت 10 جنيه كده، واتصل بشخص بتحبه الصبح بس يكون متفائل وإيجابي ومرح، ده ممكن يغير مودك 360 درجة، هتتكلمو شوية وتنمو شوية وتضحكو وتتبسطو، وأول ما هتنهي معاه المكالمة هتحس قد ايه مزاجك اتغير ونسيت النوم والتعب والتنشنة وبقيت رايق ومكمل اليوم حلو اوي.
غير مودك وبلاش تكشير وتنشنة، وصباحك بيضحك بقى!
