رئيس التحرير أحمد متولي
 5 محظورات.. «عشان متقفلش البنت منك»

5 محظورات.. «عشان متقفلش البنت منك»

لما تكون قاعد مع البنت اللي مرتبط بيها في حاجات ساعات بتعملها بتقفل البنت اللي قدامك منك، والحاجات ديه ممكن توصل البنت انها متكونش عايزة تتكلم معاك.

وعشان تكمل مع الإنسانة دي ومتخسرهاش هنقولك على الحاجات دي عشان تاخد بالك منها:

بنت تانية

أي بنت بتضايق لو اتكلمت على بنت تانية بشكل حلو قدامها لأنها بتحس إنها مش مالية عينك وبيديها انطباع إنك ممكن هتسيبها قريب  وإن حبك ليها مش دايم وزيك زي رجالة كتير غدارة.

وادي تاني

لما تكون بتتكلم معاك في حوارات مهمة مضايقها تقوم إنت مكلمها في موضوع تاني خالص زي إنهم فتحوا مطعم جديد في مول العرب.. ده  بيخليها  تفقد لغة التواصل معاك وتبقى مش عايزة تفتح حوارات معاك تاني لإنها بتحس إنها في وادي وأنت في وادي تاني خالص.

 التقليل من حلمها

لما تقولك أنا بحلم أبقى حاجة كبيرة في مجالي تقوم انت قايلها يعني هتخترعي الذرة ياخاي ده بيخليها تحس إنك مش بتشاركها أحلامها وده طبعاً هيحسسها انك بتشدها لقاع الإحباط زيك زي بعض الناس في حياتها.

اعتراض بدون مبرر

لما تاخد رأيك في حاجات وتقعد تقول لأ لأ، بدون أي تفسير ده بيركبها العصبي لأنها بتكون عايزة حد يناقشها لأن المناقشة ممكن تخليها توافق على اعتراضك لكن انت بتكون عايز تفرض سلطتك عليها كراجل وخلاص.

انتي تخنتي كدة ليه

جملة زي ديه لو قولتها ليها بطريقة جادة مباشرة اعرف انك دمرت نفسيتها لانها مش  هتكون متوقعة إنك تقولها كدة لأنك كان ممكن تقولها ليها بطريقة لذيذة غير مباشرة زي مثلاً "مالك يا بنتي لظلظتي كدة ليه" جملة زي ديه هتاخدها بصدر رحب وهتخليها تخس عشان متتريقش عليها تاني.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»