رئيس التحرير أحمد متولي
 متسبش الجامعة.. إلا وأنت معاك الحاجات دي

متسبش الجامعة.. إلا وأنت معاك الحاجات دي

قبل ما تتخرّج وتسيب الجامعة، لازمًا وحتمًا ولابد تاخد معاك حبة حاجات هتكون سند لروحك في الحياة. تعالوا كدة مع شبابيك نشوف اية الحاجات دي :)

بصمة

وأنت سايب الجامعة، خد معاك إحساس "البصمة الناجحة" اللي كنت بتسيبها في نفوس الدكاترة وتقراها في عيونهم، لمّا خليتهم يعرفوا أنّك طالب متميز ومبدع. البصمة دي هتخليك مليان شغف، هتحفزك تعمل كدة تاني، وتسيب نفس "البصمة" تاني في الحياة؛ عشان الناس حواليك يعرفوا إنّك انسان متميز، قادر يشيل مَهام ويبني الأمل في عزّ إحباطات الحياة.

حب فاشل

لو عدت عليكِ تجربة حب فاشل في الجامعة، وتعبتي لحد ما قدرتي تنسي وتكمّلي حياتك، اخرجي من الجامعة وانتي معاكي "دروس مستفادة" من التجربة دي؛ عشان لما تقابلي حب تاني، تكوني عارفة إزاي تتعاملي، ومتوقعيش في نفس الغلط و"تلبسي" في حدوتة حب فاشل تاني.

كلمة وحكمة

بُص، أي كلمة تفاؤل أو حتى حكمة  سمعتهم من أي حد في الجامعة، "حطها حلقة في ودانك"، وخليك فاكرها كويس جدًا؛ عشان لما تسيب الجامعة  وتتعرض  لمواقف في الحياة تفتكر الكلام والحكم دي، وتطبق منها اللي ينفعك.

صحاب

اخرجوا من الجامعة وأنتوا معاكوا صداقات حقيقية مش "فستك"؛ عشان الحياة محتاجة أصحاب بجد، تعرف تتسنّد عليهم وقت الشدّة، ولو ملقتش الصحاب دول في الجامعة، متقلقش مش نهاية الكون، لسه ياما هتقابل ناس في الحياة، بس أهم حاجة إيه؟ أنّهم ميكونوش "فستك".

ذكريات

من دلوقتي ابدأ تعمل كدة، تسيب ذكرى حلوة في كل ركن في الجامعة، ضحكة أو لعبة أو كلام مع ناس بتحبهم، لمّا تفتكر الحاجات دي في عز ضغط الشغل أو دوشة أولادك بعد سنين، هتهون عليك كتير، هترجع لنفس المكان في ذكرياتك، وهترجع تبتسم تاني :)

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»