لو خاطب جديد.. «لازم تعمل الحاجات دي»

الخطوبة للشاب بتبقى حدث جديد حصل في حياته زي اللي حصل للبنت بالظبط، بس الشاب بيكون عليه العامل الأكبر في العلاقة لأنه هيبقى ملزم بحاجات مادية ومعظم الشباب التزامهم بالحاجات المادية بيخليهم ينسوا الحاجات العاطفية بحجة التزامهم المادي، مع إن الحاجات ديه البنت بتبقى بتتمنى إنك تعملها بس أكيد مش هتقولها لأنها حبة إنك تعملها من نفسك عشان تحس هى بطعم فرحتها.

وعشان كدة «شبابيك» هيقولك على حاجات تعملها عشان تعيشوا في تبات ونبات وتخلفوا صبيان وبنات :)

هدية 

مش شرط تجبلها هدية في مناسبات معينة،  جرب هتلها هدية ملهاش مناسبة غير إنك بتحبها وعايز تجبلها هدية ومش شرط برده الهدية تكون سعرها عالي جداً، ممكن تجبلها هدية بسيطة فيها فكرة، وهيساعدك في ده إنك تركز هى قالتلك ايه وهى بتتكلم عن نفسها بتحب ايه نفسها في ايه، يعني مثلاً ممكن تكون قالتلك انها بتحب الرسم جداً فإنت هاتلها هدية بورتريه عليه صورتها.

خروجة 

لما تيجي تخرجوا، خرجها في أماكن جديدة مش شرط تكون غالية بس تكون مختلفة شوية عن نمط الكافيهات والمطاعم، بحيث تسيبوا فيها ذكرى، يعني ممكن مثلاُ تخرجها  في فلوكة في النيل وقبل ما تخروجوا تروح تأجر الفلوكة وتتفق مع صاحبها انه يحط ليكوا تربيزة في نص الفلوكة،  ويظبطها ليكوا و انت تكون جايب أكل من أي مكان توديه ليه بحيث يطلعوا ليكوا لما تيجوا  وتتفق مع حد من أصحابك يكون بيعزف ألة الكمان مثلاُ انو يكون مستنيكوا هناك وأول ما توصل المكان إنت وهى ترن عليه عشان يبتدي يعزف وتكلم صاحب الفلوكة عشان يجهز التربيزة.

كلام 

الكلام الحلو اللي من غير مناسبة، الرسالة اللي بتيجي ليها بدون أي مقدمات وفيها كلمة واحدة بس "بحبك" كل الحاجات ديه بتعملها  بهجة في قلبها، وبتعرف قد ايه انك بتحبها وانها اختارت الشخص المناسب اللي تقدر تكمل حياتها معاه، وهى مش قلقانة انه ممكن في يوم يسيبها وطبعاً كلامك ده لازم يبقى صادق مش مجرد كلام بيتقال.

أكل 

أسعد طريق للبنت معدتها :D شوف كدة هى كانت قالتلك بتحب تاكل ايه وابعته ليها ديليفري، وقد ايه حاجة زي كده هتبسطها جداً وهتعرف انك بتعرف هى بتحب ايه وبتبسطها بيه.

آخر حاجة

الحاجات اللي قولتها فوق اعملها وانت حابب تعملها مش انك مجبر تعملها  لأن البنت بتحس إذا كنت بتعمل ده من قلبك أو انك مجبر عليه وطبعاً لو بتعمل ده كله من قلبك هتعيشوا مع بعض في هنا طول العمر :)