بتحب وأهلك عايزين يجوزوك حد تاني.. اعرف إزاي تتصرف
في شباب كتير ممكن تتعرض لموقف ان أهلهم عايزين يجوزوهم لبنت من طرفهم، وهو أصلاً بيكون في حياته بنت بيحبها جداً ووعدها بالجواز، وفي الوقت اللي بيحصل فيه محاولات الإجبار على الجواز بالبنت دي بتبتدي شعلة الخلاف تقيد في البيت.
ولأن الخلاف مش هيوصل لحاجة غير ان أهلك هيزيد تمسكهم بجوازته من البنت اللي جايبنهالك هنقولك على حلول شوية ممكن تعملها.
اختار
اختار أي بنت من عيلتك أختك أو بنت خالتك مثلاً وتكون قدرة على اقناع والدتك والتأثير عليها.. طبعا لازم البنت دي - لو مش أختك - تكون واثق فيها وعارف انها انسانة كويسة مش منفسنة أو بتوقع وعرفها على البنت اللي انت مرتبط بيها بحيث تشوف قد ايه هى محترمة وانسانة جميلة بحيث تعرف انك كنت صح في اختيارك ليها وان هى فعلاً اللي هتقدر تسعدك، بحيث يكون معاك حد بيدعمك في اختيارك .
خلي بالك البنت اللي هتختارتها دي هيكون ليها دور كبير في الحل التاني كمان.
اعتراف
اختار وقت مناسب تقعد فيه مع أهلك وتتكلم معاهم إن فيه بنت في حياتك بتحبها و‘ن دي هى اللي اختارتها من وسط بنات كتير حواليك شدتك بأدبها والتزامها وطبيعيتها اللي مش مصطنعة زي بنات كتير بتشوفها وان هى ديه اللي تستأمنها على ولادك وقولهم ان قريبتك اللي عرفتها على البنت، تعرفها وتعرف أخلاقها كويس جداً وممكن تسألوها وده هيفتح ليك حل تالت.
شخص وسيط
هات قريبتك اللي عرفتها على البنت عشان تعرف أهلك ان اختيارك صح مش طايش وان البنت فعلاً تستحق تمسكك بيها واختار كمان شخص تاني من العيلة ممكن يكون عمك أو خالك وعرفه الموضوع وانك متمسك بالبنت اللي بتحبها وإنك عايز منه انه يكون واسطة خير في الموضوع وانه يقنع أهلك ولو الحل ده مجبش نتيجة اعمل الحل الرابع.
حرام
اتكلم معاهم تاني في فكرة الحرام إنه لو انت بعتها وروحت اتجوزت واحدة تانية انت كدة بتكسر بقلب بنت وكسرة القلب مش بالساهل وان ده هيبقى حرام وان ربنا مش هيرضى بكدة لأن ممكن يحصل ده مع أختي أو قريبتي انها بتكون بتحب حد والحد ده يسبها ويروح يتجوز واحدة تانية.
- ديه حلول تقدر تحاول فيها بكل جهدك لحد ما توصل للي انت عايزه ومتيأسش ولا تتخلى عنها لأن زي ما انت علقتها بيك حقها عليك إنك تفضل معاها وتتجوزها في وسط فرحة أهلها و أهلك :)
