«التناكة وحشة»

في ناس بتصطنع "التناكة" لأنها شايفة إنها كده بتفرض شخصيتها في المكان.. وبتحط حاجز عشان محدش يتعداه.. وفي ناس طبيعة شخصيتها إنها مبتتكلمش مع حد كتير.. فبيتاخد عنها إنطباع إنها شخصية "تنكة" مع إنها لو حد اتكلم معاها هتتكلم..

وبما إن التناكة مش حلوة إنها تكون في الولد أو البنت.. هنعرفكوا على أضرارها بحيث تتجنبوا يكون على راسكوا ريشة :D

في الشغل

لو تعاملت بتناكة مع مديرك في الشغل ده هيخليه مش مستلطفك ومش عارف ياخد ويدي معاك في الكلام.. لأنك هتكون مصدر ليه الوش الخشب زي ما بيقولوا.. وكمان زمايلك في الشغل تناكتك هتخليهم يقعدوا يتكلموا عنك لأنهم ميعرفوش شخصيتك..

في الجامعة

تناكتك هتبعد عنك الدفعة كلها وهيكونوا كارهينك.. لأنهم شايفينك دايما نافشة ريشك عليهم.. وهيحسوا إنك بتتكبري عليهم.. فلو احتاجتي ملزمة أو محاضرة أو كتاب معين من حد فيهم مش هتلاقي حد يساعدك.. وبكده أنتي هتخرجي من الجامعة ملكيش أي ذكرى حلوة فيها.

في الحب

تناكتك هتخلي البنت تتشد ليك وانت ممكن تكون بتحبها بس تناكتك منعاك تقولها.. والبنت هيزيد تعلقها بيك وأنت ولا أنت هنا ولا بتفكر إنك تقولها.. وفيه احتمالية إنك تكون فرحان إن حد بيحبك وبيتقطع عشانك وكل ده في الآخر هيوصل إنك هتكون دمرت نفسية البنت.

في الحياة

الناس اللي هيقابلوك في الحياة هيحسوا إنك بتحتقرهم.. وأنهم مش قد المقام زي مثلا حارس عمارتك أو أي حد تاني.. ده طبعا هيخلي الأسئلة تدور في دماغهم "ليه بيعاملنا كده؟".. لأن الناس بتكون معملتش حاجة وحشة معاك تستاهل تعاملك معاهم بالتناكة ديه.