رئيس التحرير أحمد متولي
 طالب وعايز تحوّش فلوس؟.. إليك 8 أفكار

طالب وعايز تحوّش فلوس؟.. إليك 8 أفكار

انت طالب في الجامعة؟ يبقى أكيد لسه بتاخد مصروفك، كمان في حاجات نفسك تمتلكها وأماكن نفسك تروحها وخروجات وفسح عايز تعملها ومكنتش عارف تعملها وانت لسه تلميذ في المدرسة، علشان كده بنقدملك أفكار ازاي توفر من مصروفك وتزوده كمان.

الخصومات الطلابية

لازم تستفيد من الخصومات اللي بتتعمل للطلبة، ذي اشتراك المترو، واشتراك القطر، لو كنت بتسافر، بيكون عليها خصم مش أقل من 50%، كمان فيه مراكز للكورسات بتعمل خصم للطلبة، اسأل ودور على الأماكن دي علشان تستفيد منها.

اشترك في المسابقات

سواء مسابقات الجامعة أو الكلية، غالبا المسابقات دي بتكون أبحاث عن موضوعات معينة أو كتابة قصص أو غيره، يعني الحكاية سهلة مش هتاخد منك وقت كتير، في الحقيقة إنت أكيد هتستفيد منها، لأن بيكون فيها جوايز مالية، لو مكسبتش، انت برده المستفيد لأنك هتعرف معلومات جديدة.

اركب عجلة

لو بيتك مش بعيد عن الجامعة ممكن تشتري عجلة وتوفر فلوس المواصلات، كمان ممكن تكون دي فكرة تعملها انت وصحابك، يعني يبقى سباق عجل، ممكن انت تكون البداية وتنشر الفكرة في باقي الجامعات، ومتنساش إن مصر بتشجع ركوب العجل.

خليك جنب الجامعة

لو مغترب خد سكن قريب من الجامعة بتعتك، لأنك لو خدت سكن بعيد، كده مش هتحتاج مصروف كل شهر، ده هيبقى كل اسبوع تقريبا.

خد أكلك معاك

كتير من طلاب الجامعة نص مصروفهم تقريبا بيروح على الأكل في كافيتريا الجامعة، لأنك أغلب اليوم بره، لكن لو عايز توفر، خد أكلك معاك، متتكسفش لأنك هتلاقي ناس غيرك بتعمل كده، أولهم موظفين الكلية، غير إن أكل البيت صحي أكتر، بكده هتوفر الفلوس اللي ممكن تتصرف عند الدكتور بسبب إنك أكلت حاجة ملوثة.

دور على شغل

ممكن تشتغل وانت بتدرس، بيكون فيه فرص شغل للطلاب بدوام جزئي، عدد أيام أقل، اشترك في صفحات ومواقع النت اللي بتوفر فرص شغل، روح اسأل بنفسك في الأماكن اللي تعرفها.

متشتريش كتب

ده يتوقف على طبيعة دكاترة الكلية، يعني لو مفيش نظام الشيت وتسجيل أسماء الطلبة اللي اشتروا الكتاب، يبقى كده تمام، في الحالة دي هتصور الكتب بدل متشتريها، سواء من صحابك أو من مكتبة الكلية، لو عايز توفر أكتر صورها بره الجامعة.

حدد ميزانية

من الأفضل إنك تحدد مبلغ معين تصرفه كل شهر، لأن ده هيخليك تشتري الحاجات اللي محتاجها بس، لكن لو مش محدد لنفسك مبلغ معين، غالبا هتصرف فلوسك في حاجات ملهاش لازمة، بعدين ترجع تقول "أنا مش عارف الفلوس بتروح فين."

أسماء أبو بكر

أسماء أبو بكر

عن كاتب المقال: صحفية مصرية حاصلة على كلية الإعلام من جامعة القاهرة، تهتم بشؤون الطلاب