عن التحرش الأونلاين.. الدنيا اتطورت ياجدعان!
السوشيال ميديا مكان الهروب الوحيد من الواقع، لكنه أصبح عالم افتراضي في نفس درجة قبح العالم الحقيقي وأصبح رافع للبنات شعار «إهربي كمان وكمان، التحرش في كل مكان».
الدنيا إتطورت التحرش مش هيتطور يعني؟.. تعالو نشوف أبرز أشكال التحرش في العالم الافتراضي ومحاولات البنات لصده:
Other message
المكان الأكثر خطورة بعد مثلث برمودا، ممكن تلاقي ألغام جوه، مقر التحرش بكل أنواعه..أول نوع التحرش المغلف بطبقة شيك من الكلام اللي في الأول بيبقى إنتي جميلة وأنا عايز أعرفك، لأ لازم نبقى أصحاب وشوية كلام مش مقبول في النص.. لحد هنا الموضوع بيبقي مقبول لأنه بيكون طلب ممكن يتقبل أو يترفض من الطرف الآخر لكن المشكلة في إنه لو تم رفضه الطرف"المتحرش" بيبان بقى وبيبدأ يقول الكلام اللي كان المفروض يقوله في الأول بس آجله.
في نوع تاني وده بيكون عن طريق إرسال صور إباحية للشخص أو صور عامة بس جنسية و نوع مختلف بيدخل يشتم وبس و ينتقد البنت وفي الآخر يرميلها كلمتين في النص عن غرضه الأساسي.
ريبلاي التحرش
بقت قاعدة أنه مجرد ما بنت تعلق على حاجة في صفحة لاقي حد بيدخل يرد عليها في السايق أو بيتناقش وحد تاني في النص مالوش علاقة بأي حاجة "بيتحرش" وفي نوع أشيك بيبعت في الـother عشان يتدارى ليكون في حد عارفه ويشوف كلامه.
أما النوع "البجح" فده بيعمل "شير" لكلام لبنت ويعلق تعليق سخيف على شكلها أو لبسها أو على كلامها ويغلط بس هو عارف كويس إن لو حد كلمه هيرد بإيه "ده بروفايلي و دي حريتي الشخصية" وكأن اللي قدامه بينتهك حريته فعلاً.
سكرين شوت
المتحرشين دلوقتي بقى لهم عقاب على السوشيال ميديا وهو «السكرين شوت» لكنه مش عقاب رادع لأنهم بقوا بيتباهوا بكده وبيغلطوا البنت كمان زي الواقع تمام.. كمان طلعت توجهات بتبرر التحرش وبتقول«التحرش طالما ?in puplic and with no feelings, so what»، وإنه ليه البنت تفضح متحرش أصلاً، كأن الفضيحة مرفوضة ولكن الفعل مُبرر.
الحل فين؟
لأ مفيش، بس في عقاب زي السكرين شوت، البلوك، الريبورت، وإبلاغ مباحث الإنترنت أو التهديد بكده على الأقل عشان نبدأ نحارب التيار الجديد «إتحرش ولو بماسيدج» ده.
