رئيس التحرير أحمد متولي
 إزاي تتعاملي مع شخصية «أطاطا» في المناسبات

إزاي تتعاملي مع شخصية «أطاطا» في المناسبات

وأنتي معزومة في فرح أو أي مناسبة أو حفلة.. بجانب تفكيرك هتلبسي إيه وهتجيبي كعب طوله قد إيه.. فكري إنك هتقابلي معازيم كتير لازم تستعدي كويس جدًا عشان ميتحرقش دمك.. لأنك هتقابلي شخصيات رزلة زي "أطاطا".. هنقولك إزاي تتصرفي معاها..

عريس لقطة    

هتلاقي واحدة داخلة عليكي فجأة وأنتي بترقصي أو بتاكلي أو قاعدة مع أصحابك على الترابيزة، أو حتى في الحمام، وتروح شداكي من إيديك وتقولك أنت قمر يا حبيبتي أنا متابعاكي من ساعة ما دخلتي القاعة، وجايبالك عريس لقطة "أبني" وتروح ضاحكة، طنط ديه بقى لو عايزة تخلصي منها قوليلها: أنا مرتبطة يا طنط وهى هتقولك يا خسارة وهتمشي.

 بنات أخر زمن 

هتلاقي كده شوية معازيم بيكونوا من أول الفرح لأخره قاعدين على الترابيزات وضاربين بوز وباصين لأي حد بيرقص باستحقار، وفي سرهم تلاقيهم بيقولوا إيه المياعة ديه بنات أخر زمن، فأول لما تطلعي ترقصي وتلاقيهم باصين ليكي كده جيبي أصحابك جنبهم وارقصوا وبصلهم كل شوية واضحكي.

اتنين بينموا 

هتلاقي إتنين كل لما تتحركي يبصوا عليكي ويجيبوا في سيرتك، وتلاقيهم بيقطعوا فروتك، حلهم إنك كل لما تشوفيهم بينموا ويبوصوا ليكي تجيبي أي حد من أصحابك وتروحي ناحيتهم وتاخدي أنتي وصاحبتك سيلفي جمبهم وتضحكي الضحكة المتينة.

ده خطيبي 

هتلاقي واحدة جاية تسلم عليكي ومعاها خطيبها وهيبقى بابن على وشها إنها مش جاية تسلم وخلاص، لأ ديه جاية تسلم عشان تغيظك لأنها عارفة انك لسة مرتبطيش، فهتلاقيها بتتك على كلمة خطيبي وهى بتعرفك عليه، وتقولك ده خطيبيييييي، في الموقف ده المطلوب منك إنك تكوني باردة وهادية ومبتسمة وبتدعلهم بالتوفيق من كل قلبك؟

إيه ده .. أنتي تخنتي! 

هتلاقي واحدة فجأة بتجري عليكي وفاتحة بقها وبتقولك "ايه ده أنتي تخنتي قوي"، في الوقت ده لازم تمسكي أعصابك.

 

الكلمات المفتاحية

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»