تعرف على احتفالات عيد الربيع في الصين
لو كنت من عشاق الثقافة الصينية أو سافرت الصين قبل كده، يبقى أكيد سمعت عن عيد الربيع الصيني اللي مش بس مجرد عيد عادي لكن مهرجان كامل في الصين.
بيختلف ميعاد عيد الربيع الصيني من سنة للتانية حسب التقويم القمري في السنة الجديدة، لكن غالبا ما بيكون في أواخر يناير لحد نص فبراير، وبيستمر 10 أيام وأكتر، واللي بيعتبر أجازة رسمي في الدولة كلها.
- الأجازة
كل الشركات والمكاتب وحتي المحلات الكبيرة والصغيرة بتقفل أبوابها، يعني لو عايز تشتري حاجة لازم تكون مشتريها قبل العيد، الصين كلها اجازة 10 ايام او اكتر.
- وقفة العيد
ليلة عيد الربيع في الصين بتشبه عندنا ليلة عيد الفطر كده، يعني مفيش نوم، والسهر للفجر، ويرجع الطلبة والعمال المغتربين لقريتهم الصغيرة، وتتلم العيلة كلها ليلة العيد، وبمجرد ما تدق الساعة 12 بليل، الكل يبدأ يأكل فطاير حلوة شبه "قطايف رمضان" اسمها (دياو زي).
والأطفال في كل البيوت ليلة العيد بتخرج تحتفل بالألعاب النارية، وتسمع أصوات عالية جدا لدرجة أنك مش هتعرف تغمض وتنام ساعة واحدة بس في الليلة دي.
- الزينة
مفيش بيت ولا شارع ولا محل في الصين إلا وبيعلق فوانيس حمراء كبيرة ومنورة على الأبواب والمداخل، وبيكتبو جمل وعبارات بإيديهم ، بيتمنوا فيها الخير والفرح والسعادة، وده طقس مهم جدا في عيد الربيع
- لبس العيد
مفيش عيد من غير لبس جديد، يعنى تلاقي الأطفال والشباب لابسين ملون ومنقوش وفي أحلى صورة ليهم،وكله جديد ف جديد، وطبعا لازم لبس العيد يكونوا شاريينه قبل العيد بفترة كافية عشان الزحمة.
- الزيارات
العيد يعني زيارات عائلية، العيلة الصغيرة الأب والأم والأولاد يروحوا يزوروا العيلة الكبيرة الجد والجدة والعمات والخالات، ويتغدوا كلهم سوا على ترابيزة واحدة، وضحك وكلام في كل حاجة وجوعائلي دافي يشبه بيوتنا المصرية، وكمان الأولاد بيزوروا أصحابهم ويخرجوا سوا.
- الفسح
في كل شارع وحي في الصين، هتلاقي مسارح ومهرجانات ومسابقات وأغاني ورقص وعروض كتير جدا كل يوم لحد أخر يوم في العيد، وطبعا الشعب كله بيتفسح ويخرج بس مش زحمة زي عندنا لأن كل مكان فيه احتفال، فالناس مش هتتكدس في مكانين أو تلاتة يعني.
من الاخر كده لو عايز تستمتع في الصين يبقى روح في عيد الربيع حتى في خصومات على أسعار الطيران كمان، بس خليك عارف انك هتتبسط وتعيش اجواء مميزة جدا!
