رئيس التحرير أحمد متولي
 الحشيش المقدس.. كيف يستقبل بعض المصريين أعيادهم؟

الحشيش المقدس.. كيف يستقبل بعض المصريين أعيادهم؟

الكاتب الراحل إحسان عبد القدوس، قال: «لقد تعودنا التمتع بالأوهام كمدمني الحشيش! فتمتع بأوهامك»، وتحقيقاً لمقولته اعتاد المدمنون تناول الحشيش بجانب المواد المخدرة الآخرى «لزوم القعدة»، تحت وهم الفرحة والبهجة وإن «الدنيا عيد».

المصريون «أصحاب الكيف» يسلكون طرقاً مختلفة للاحتفال بالأعياد، تحولت جميعها لـ«طقوس مقدسة»، وباعتبار أننا «شعب متدين بطبعه» اعتادوا استقبال أعياد الفطر، والأضحى، ورأس السنة الميلادية، بتناول المخدرات على رأسها الحشيش «وده عشان الخمرة حرام».

جلسات وتجمعات «الحشاشين» في كل المناسبات خاصة الدينية مليئة بالمواقف «المضحكة المبكية»، ولأن «ساعة الحظ متتعوضش» نرى في عيد الفطر من يتباهى أنه لم يتعاطى طيلة أيام الشهر الكريم – رمضان – انتظاراً لليالى العيد المقدسة، وفى عيد الأضحى يتحدثون عن تناول الحشيش لـ«هضم اللحمة»، أما ليلة رأس السنة والأفراح بيقولوا إن الدنيا مع السجارتين بتبقى؟.

فى «الكيف» لافرق بين فقير أو غني

الأسطى محمود صالح، 56 عاماً صاحب ورشة خراطة، بيقول إن شرب الحشيش طقس اعتاد كثير من الناس ممارسته بصفة دائمة، بإختلاف مشاربهم، سواء كانوا من سكان المناطق الشعبية أو الراقية، سواء كان المتعاطي متعلم أو أمِّيّ.

وكمان بيقول: إن الناس اتعودت شرب الحشيش وانتشاره بكثرة في المواسم والأعياد والأفراح، وأن فى لحظة «الكيف» ما فيش فرق بين غنى وفقير كلهم متساويين «أصحاب مزاج»، لكن الفرق الوحيد فى «الكارفة»، يعني قوة ومفعول المادة المخدرة.

الكيف..«مناولة مش مقاولة»

ويوضح المعلم فرج حافظ، صاحب محل قطع غيار بمنطقة السبتية، أنه يتجمع مع أصحابه فى «مُكنة» – لفظ يطلق على أى مكان للتجمع – فى المناسبات خاصة الأعياد، عشان يشربوا حشيش وبيرة ويوصلوا للسعادة ويقدروا يقضوا اليومين بعيد عن قرف الشغل.

عن أسباب تناول الحشيش فى المناسبات، قال: «من ساعة ما جيت الدنيا شوفت الناس بتحشش أيام العيد وخاصة يوم الوقفة عشان يبقوا سعداء وفرحانيين.. ده حتى قالوا العيد فرحة»، وكشف أن شرب الحشيش أمر له قواعد وأصول ثابتة يحفظها «الحشاشون» عن ظهر قلب لا يمكن مخالفتها فى قعدات الفرفشة.

قواعد وأصول شرب الحشيش فى القعدات تتلخص فى عبارة «الكيف مناولة مش مقاولة» زى ما قال المعلم «فرج»، وشرح المقصود بالجملة، قائلا التالي:

أصول شرب الحشيش!
  • لما تكون فى قعدة فرفشة وهتشربوا حشيش في سجاير لازم الصغير يحترم الأكبر منه سناً وميولعش السيجارة قبله

سيجارة حشيش

  • متمسكش السيجارة فى ايديك وقت كبير لما حد يديهالك لازم تناولها للى جنبك بس باتجاه «ايديك اليمين»
  • لو كانت القعدة شرب حشيش على شيشة يختلف الأمر لازم اللى يولع الحجر في البداية الأصغر سناً وده لأنه بيحتاج قوة نفس.

حشيش على جوزة

  • كمان لو لقيت واحد مسطول أكبر منك متتريقش عليه فى القعدة لأن ممكن تبوظ
  • بعد انتهاء قعدة الفرفشة مينفعش تتكلم عن اللى حصل في «المُكنة» وإلا يركبك «حق عرب»

أما هاني الزناتي، الشهير بـ«هاني حديدة» عشان كان حداد قبل ما يتقبض عليه في قضية اتجار بالمخدرات ويتسجن 3 سنوات، أكد أن تجارة الحشيش تنتعش في المواسم والأعياد بصورة كبيرة خاصة أعياد الفطر والأضحى ورأس السنة.

«الزناتي» شايف إن تعاطي الحشيش أضراره زيها زي السجاير، وبيفتح النفس للأكل، وكمان بيأكد على أن تعاطي الحشيش أقل ضرراً من شرب الخمرة المحرمة في القرأن الكريم!، أو «شك البودرة» اللي قال عليها «الساحرة الشريرة».

كل ما تريد معرفته عن الحشيش

إيه هو الحشيش: مادة مستخلصة من نبات اسمه القنب انتشرت في كل دول العالم، ليها تأثير مخدر على متعاطيها، وبتسبب الهلوسة لو تناول بكمية كبيرة

ازاى بيتشرب الحشيش: عن طريق الفم والطرق الأكثر انتشارا هى خلطه مع التبغ ولفه كسيجارة، أو رصه على الشيشة، أو فرده وتعليقه في سيجارة أو بواسطة دبوس وتعليقه داخل كوباية وتسمى هذه الطريقة «خوابير».

سجائر حشيش

أضرار الحشيش: طبياً بيتسبب في أمراض كلها عكس اللي بيقول عليها مدمنيه يعني مبيعملش سعادة بالعكس أثبتت التجارب والتحاليل أنه بيعمل اكتئاب بعد فترة طويلة، وهلاوس سمعية بصرية، وبيضعف التركيز، وزيادة ضربات القلب، والانتفاخ، والإمساك، وضعف القدرة الجنسية عكس الشائع، والخرف المبكر، وضيق الشعب الهوائية، وسرطان الرئة

 الحشيش زمان ودلوقتي

الفرش والكيس: تجار الحشيش بيلفوا حتة وزنها من 200 إلى 250 جراماً زمان بالقماش ودلوقتى بكيس بلاستيك.

القرش والصباع: معياري البيع بين تاجر المخدرات والمدمن، قديماً القرش وحالياً الصباع، حجمهم عرض سنتيمتر والطول 6 أو 7 سنتميتر.

الربع: يبلغ حجمه سنتيمتر فى سنتميتر

 

كيس حشيش وصوابع

 

أحمد كمال متولي

أحمد كمال متولي

رئيس تحرير منصة شبابيك، صحفي سابق بجريدة اليوم السابع، وعضو نقابة الصحفيين المصرية