رئيس التحرير أحمد متولي
 اتدبست فى الكلية؟ علامات تقولك «لف وارجع تاني»

اتدبست فى الكلية؟ علامات تقولك «لف وارجع تاني»

بعد أسبوع أو شهر أو سنة من دخول الجامعة، شباب كتير بتحول من جامعاتها وكلياتها عشان الكلية دي مش مناسبة له ومش عارف ينجح فيها، المشكلة أنه ممكن يروح كلية واتنين وتلاتة ويحول منهم كلهم، والأغرب أن فيه ناس بتحول بعد سنة أو أكتر كمان يعني تتخرج وانت عندك 26 سنة مثلا، وممكن كمان تشتغل في مجال تاني خالص، طب ما تيجي نعرف امتى تكون الكلية مش منسباك وتحول منها بسرعة.

المواد العلمية لا تناسبك

أبسط وأسرع طريقة تعرف أن الكلية بتاعتك مش مناسبة لك أن المواد العلمية اللي بتدرسها مش قادر تفهم ولا تحفظ فيها حرف بكل معنى الكلمة، ودماغك في عالم والكتاب اللي قدامك في عالم تاني خالص، ومهما الدكتور شرح وانت بصيت في الكتاب مش قادر تفهم ولا تتعايش، ساعتها أوعى تمشي بمقولة "كل شئ في أوله صعب" لأنك بتجر نفسك في سكة السقوط أو التحويل بعد فترة.

لا تناسب طموحك

لازم تحط لنفسك طموح من البداية كده حتى لو التنسيق والمجموع كان السبب أنك تروح كلية تانية، يبقى ألحق نفسك وحط طموح بديل، ولو لقيت الكلية اللي أنت فيها مش هتحقق طموحك، حول كلية تانية بس لازم تكون عارف انت عايز ايه بالظبط، وهتعمل ايه في خطوات ومراحل تحددها من دلوقت، وقبل كل ده تواصل مع ناس في الكلية دي واسألهم عن كل حاجة قبل ما تحول.

أجبرت على دخولها

كتير بيكون طموحنا حاجة واهلنا طموحهم حاجة تانية خالص، وبنجبر على دخول كلية معينة لمجرد أنها كلية قمة أو إرضاء لأهلنا وتحقيق لأمل العيلة عشان يتباهو بك، المشكلة أنك مش هتتباهى بنفسك بعد كده لأنك يا إما هتحول من الكلية بعد فترة أو أنك هتتخرج ومش هتشتغل بدراستك خالص لأنك مش حاببها، دور على طموحك والكلية اللي نفسك فيها عشان تنجح فيها وتكون مميز كمان في شغلك، ومتخليش حد يجبرك على حاجة.

تعتمد على التلقين

إذا لقيت الكلية بتعتمد بس على التلقين والتحفيظ، يبقى أنت مش هتستفيد حاجة خالص غير أنك تاخد شهادة وتتخرج وتشتغل بقى موظف إداري في أي شركة أو مكتب خاص أو حكومة، اختار كلية تتعلم منها حاجة جديدة ويبقى لك طموح وهدف منها مش تحفظ وتعدي السنة وتاخد الشهادة الكبيرة وخلاص.

ياسمين الصاوي

ياسمين الصاوي

مترجمة صحفية مهتمة بالتكنولوجيا والقضايا المجتمعية