هدايا وأفكار مختلفة للبيبي.. تعرفي عليها

لحظة ولادة ابنك أو بنتك بتكون تاريخية، وطول عمرك بتتمنيها ولازم تحتفلي بيها احتفال خاص مع جوزك والبيبي بعيدًا عن السبوع اللي هتجمعي فيه الناس. في الموضوع ده «شبابيك» بتقترح عليكي شكل الاحتفال ده عشان تبقى ذكرى حلوة.                         

جلسة تصوير 

هتشوفي أي فوتوجرافر يعمل لطفلك جلسة تصوير، وياخد ليه صور مختلفة تبقى ذكرى حلوة ليه لما يكبر ويشوفها ويفتكر قد أيه كان ملاك صغير :)

وكمان ممكن تشاركيه أنتي وباباه في الصور ديه وتعلقي الصور في البيت وتحطي حوالين الصور ورود صغيرة عشان تبرزها وتديها شكل جمالي :)

تيشرت حب

جهزي تيشرت ليكي وليه ولباباه مكتوب عليه مثلًا I Love you baby أو أي جملة تعبروا بيها عن حبكوا ليه، واعملوا فيديو كل واحد فيكوا يتكلم عن احساسه أول ما شفتوه ونصايح بتدوها ليه.

سفر مع البيبي

أكيد فيه مكان في مصر أو برة مصر بتحبيه قوي أنتي وجوزك واتمنيتوا تسافروا ليه فهتبقى حاجة حلوة قوي لما تسافروا وانتوا معاكوا حتة منكوا.. ابنك او بنتك أما بقى لو عرفتي أن صاحبتك ولدت ومحتارة تيجبلها أيه لأنك شايفة أن مامته أكيد جابتله كل حاجة، فـ«شبابيك» بتقولك افترضي إن مامته مجبتش أي حاجة واختاري هدية من الهدايا دي.

شنطة حمزة  

هتجيبي شنطة وتحطي فيها الحاجات اللي هتحتاجها زي: البيبرونة، والتيتينا، والسلوبتات، والبافيتة، والباطنية، وأي حاجة تانية أنتي عايزاها وهاتي من الحاجات دي عدد معقول.

بامبرز

البامبرز دايمًا مشكلة بالنسبة للأم لأنه بيخلص بسرعة وبتحتاج تجيب تاني فممكن أنتي تجيبي ليها كمية كبيرة من نوع كويس جدًا ويستحمل وتقضيها فترة طويلة وهتكون هدية مختلفة ومش متوقعة بالنسبة ليها.

كريمات ترطيب

زي ما الكبار ليهم كريمات ترطب جسمهم بردو البيبهات ليهم كريمات ترطيب مختلفة ممكن تدوري عليها وعلى أحسن أنواعها وتجيبيها ليه في بوكس صغير.  

أول لبسة  

اشتري للمولود جاكيت وتيشرت وبنطلون وجزمة لو ولد، ولو بنت اشتري فستان وكلون وتوكة، ده لبس الخروج اللي هتختاريه ليها كهدية وتكتبي على الكارت أول لبسة يلبسها لما يكبر حبة :)

لعبة مختلفة 

دوري كدة على لعب تعرف تخليه يشغل دماغه ويفكر ويطلع مواهبه زي الميكانو والبازل و البيانو أو قصص معاها السي دي بتاعها بحيث مامته تقرأها ليه أوتشغل السي دي يسمعها والسمع ده ممكن يخليه ينام وهو المطلوب عشان ميفضلش يعيط.