«على قد الإيد».. اشترى هدية «فلانتين» فضة من 70 لـ200 جنيه

الفضة هدية قيمة جدا في «الفلانتين»؛ ومناسبة للولاد والبنات، وده لأنها بتشمل اختيارات كتير للجنسين، زي الإكسسوارات والميداليات والحظاظات.

كلمة «فضة» ممكن تعمل لك قلق شوية من الأسعار، ورغم القيمة المعنوية الكبيرة للفضة، أسعارها في متناول الجميع؛ خاصة أنك تقدر تتحكم في عدد الجرامات والشكل والحجم، وتشتري حاجة قيمة وشكلها حلو وفي متناول إيدك.

«شبابيك» تجولت في منطقة خان الخليلي بالحسين، ورصدت لك أسعار الفضة في الورش والمحلات، وكمان هنعرض لك شغل الـ«هاند ميد»، اللي تقدر تجيب منه هدية مميزة لشريك حياتك، محدش يلبسها غيره.

خواتم بـ70 جنيها

محلات الفضة تقدم لك تشكيلة من الخواتم الفضية الصغيرة، والخواتم دي بتعجب البنات، لأن تصميها بيكون رقيق جدا ومتنوع في الأشكال.

أسعار الخواتم دي تبدأ من 70 جنيها، في محل «محمد السقا» بخان الخليلي. وبيزيد السعر مع زيادة الوزن والحجم. ولو حابب توفر أكتر، حاول تبعد عن الخواتم اللي فيها فصوص، لأن الفصوص تقيلة وبتوزن وبتتحاسب عليها بنفس سعر جرام الفضة بالظبط.

إنسيالات بـ100 جنيه

في نفس المحل هتلاقي إنسيالات فضة، أسعارها تبدأ من 100 جنيه مصنوعة من فضة إيطالي وسويسري.

وكمان ورشة «سعد أوف إيجيبت» في خان الخليلي، ممكن تعملك الإنسيال «هاند ميد»، بالتصميم والوزن اللي أنت عايزه، وتستلمه بعد يوم واحد فقط.

هاند ميد للولاد والبنات

لو عايزة تشتري هدية مميزة لشريك حياتك، مفيش أحسن من الـ«هاند ميد»، حاجة مميزة ومعمولة مخصوص ليه، ممكن سلسلة أو ميدالية محفور عليها اسمه. وسعرها بيبدأ من 200 جنيه وممكن أقل أو أعلى على حسب الوزن.

أما بقى لو عايز تختار لها حاجة فضة مفيش حد غيرها يلبس زيها، فممكن تختار التصميم اللي يعجبك، وعليك وعلى محلات «سعد أوف إيجيبت» ودي ورشة وليها محلاتها في المعادي، والمهندسين، ورمسيس هيلتون في التحرير، وكمان في خان الخليلي. وهتستلم هديتك بعد يوم واحد فقط.

الدلاية الـ«هاند ميد» ممكن وضعها في سلسلة وتكون هدية للبنت. وللتواصل مع صفحة «سعد أوف إيجيبت» على «فيس بوك» اضغط هنا.

طقم فضة بـ200 جنيه

في محلات «محمد السقا» بخان الخليلي، هتلاقي أطقم فضة، مكونة من خاتم وحلق ودلاية؛ والأسعار بتبدأ من 200 جنيه، على حسب الوزن والحجم. وأنت اللي بتحدد حسب مقدرتك.

وممكن تكون بنفسك الطقم اللي أنت عايزه، لو الاختيارات الجاهزة مش عجباك، وتختار سلسلة وخاتم أو خاتم وحلق أو إنسيال وخاتم، أو غيرها من الاختيارات.

وفي الآخر دي كانت مجرد نماذج، لكن لو نزلت بنفسك هتلاقي اختيارات أكتر سواء للأولاد أو البنات. وقبل كل ده لازم تعرف أن جرام الفضة المصري بيبدأ من 10 جنيه، أما الإيطالي والسويسري بـ25 جنيها، وممكن يوصل لـ30 جنيها؛ لأن معرفتك بنوع الفضة وسعر الجرام بالظبط هيديك قدرة أكبر للتحكم في السعر اللي أنت عايزه.