4 نجمات شابات عندهم «وش مصري»
4 نجمات شابات عندهم «وش مصري»
من أول ما ظهروا على الشاشة وملامحهم حفرت نفسها في مخيلتنا وده لأنها ملامح مصرية أصيلة كل تفصيلة من تفاصيلها بتعبر عنا وعشان كده حبينا نوثق في الموضوع ده من «شبابيك» ملامحهم عشان كل الأجيال اللي هتيجي بعد كده يعرفوا قد إيه أن الملامح المصرية جمالها «جمال رباني».
ناهد السباعي
تحسها أختك، جارتك، حد من قرايبك وده من شدة قربها من بنات مصر، عملت أعمال صحيح مش كتيرة قوي بس تعتبر علامات في التاريخ الفني، زي فيلم 678 اللي عبرت فيه عن البنت اللي بتتعرض للتحرش وإزاي متخافش وتدافع عن حقها لحد أخر لحظة.
وكمان دورها في مسلسل «بنت اسمها ذات» و«فيرتيجو» و«السبع وصايا» اللي قدرت في كل دور فيه تسيب بصمة فنية مختلفة، وبما اني بتكلم عنها فلازم أتكلم عن تجربتها في الفيلم القصير «حار جاف صيفًا» اللي لما تشوفوا التريلر بتاعه هتشوفوا قد أيه ملامحها مصرية.
أروى جودة
الفرعونية في ملابس عصرية، ده أدق وصف ينفع لوصف أروى أن ملامحها فرعونية قوي وفيها سحر يخليك تركز معاها من أول ما تظهر على الشاشة سواء في مسلسل «المواطن اكس» و«العهد» اللي خلتنا فيه نتمايل على أغنيتها «حن على القلة دا الغريب حن ما تحن على القله دا الغريب حن ».
نسرين أمين
قمحاوية وبعيون كحيلة، نسرين أمين كوليكشن إبداع فني وملامح مصرية معتبرة. أدوارها في مسلسل «بنت اسمها ذات» و«سجن النسا» كانت أدوار من العيار التقيل خلتنا كلنا نبقى مذهولين من كتر إبداعها. وقدرت تخلينا أول ما نفتكر اسمها نفتكر على طول جملتها في مسلسل «سجن النسا» اللي بتقول فيها «زينات اللي بتزوق البنات».
أمينة خليل
الكلاسيكية ذات الصوت الرنان. دي بقى أمينة خليل المصرية المنحوتة بجمال في تفاصيلها واللي صوتها يخليك تركز على طول معاها في «طرف تالت» و«شربات لوز» وفي كل عمل بتعمله :)
