رئيس التحرير أحمد متولي
 5 خطوات للتخلص من عاداتك السيئة

5 خطوات للتخلص من عاداتك السيئة

لديك عادات سيئة ولا تعرف كيف السبيل إلى تركها؟ هل تتسبب هذه العادات كل يوم في خسارتك من حولك؟ لو أنت كده «شبابيك» عملتلك التقرير ده، وفيه هيقولك استشاري الطب النفسي الدكتور إبراهيم مجدي حسين على 5 نصائح تساعدك في التخلص من عاداتك السيئة.

  • خطط ليومك

الخطوة دي مش هتساعدك بس في تنظيم وقتك، لا دي كمان مش هتخلي عندك وقت فاضي تمارس فيه الفعل ده، بالإضافة إلى إنها هتحسن علاقتك باللي حواليك لإن الشخص المنظم بيحترمه الناس وبيحبوا يقربوا ليه، وكمان هتعرف أصحاب جداد بعيد عن اللي كانوا بيشجعوك على الفعل القديم.

اقرأ أيضًا ⇐ «4 عادات تضر بصحتك احرص على تجنبها»

  • تعلم أنشطة جديدة

من المهم جدًا في المرحلة دي إنك تمارس نشاط جديد بحيث يكون معندكش وقت فاضي تمارس فيه أي حاجه تانية غير اللي في الخطة، كمان هنا هتقدر تنفتح بشكل أكبر على العالم اللي حواليك ورؤيتك لكل حاجة حواليك هتختلف تمامًا.

لو قدرت تحقق ده هتعرف إن وقتك الجاي لازم تقضيه في كل حاجه بتريحك مش اللي بيخليك تعبان نفسيًا.

  • ابعد عن الأماكن اللي بتفكرك بالعادة

لو فكرت في لحظة إن الخطوة دي مش ضرورية ومش هتأثر على باقي الخطوات، يبقى كل اللي بتعمله مالهوش لازمة لإن إيه فايدة إنك تتعلم أنشطة وتخطط وإنت بتروح لنفس الأماكن اللي بتفكرك بالعادة السيئة دي.

  • اختار أصحابك بعناية

مش منطقي إني أكون لسه على علاقة بنفس الأصحاب اللي كنت مثلًا بشرب معاهم مخدرات، وأقول أنا هعرف أسيطر على نفسي وامنعها من الشرب أو لو عادتك دي مثلًا العصبية وأكون لسه على علاقة بالناس اللي بتعصبني.

اقرأ أيضًا⇐ «تجنب هذه العادات الخاطئة في مذاكرة ما قبل الامتحان»

  • حط لنفسك بدائل

مينفعش تكون نويت تبطل السجاير وإنت مش هتستبدلها بحاجه تانية زي اللبان أو اللب مثلًا؛ لإن في الوقت ده الرجوع هيبقى أسهل مما تتخيل.

أو لو إنت مثلًا شخص بتحب تقضم أظافرك لما بتكون متوتر والموضوع اتحول معاك لعادة، ممكن تتفق مع زميلك في العمل أو أهلك في البيت أن من يراك تفعل هذا يقوم بضربك على يدك.

سوزان حسني

سوزان حسني

صحفية مهتمة بالكتابة في مجال العلاقات