رئيس التحرير أحمد متولي
 لو أنت مستجد في الجامعة.. خد بالك!!

لو أنت مستجد في الجامعة.. خد بالك!!

انت طالب مستجد بالجامعة؟ داخل سنة أولى يعني متستغربش من أى حاجة هتشوفها.. هتقابل شخصيات كتيرة مختلفة، حاول تتعايش معاهم وهتقابل بردوة شوية حاجات مش عارفها حاول تاخد فكرة عنها.

وأكيد هتبقىعايز تعرف إزاى تتعامل مع الشخصيات اللى هتقابلها.. «شبابيك» هتعرفك مين هما؟ وازاى تتعامل معاهم.

الدحيحة

دول بقا هتلاقيهم موجودين فى المدرج من بداية أول محاضرة لغاية  نهاية اليوم الدراسى، وبيبقوا قاعدين في أول بنج مش بيعملوا حاجة غير انهم بيكتبوا ورا الدكتور من أول كلمة صباح الخير،  لغاية السلام عليكم..  ولو بقا جيت طلبت منهم الكشكول تنقل المحاضرة أو حاجة فاتتك فى الغالب مبيوافقوش.

الحبيبة

دول بقا اللى مورهمشي فى الجامعة إلا انهم يقعدوا فى كل كافيه فيها «متعهدين كافيهات» ونازلين حب فى بعض وغرام ولا بيحضروا محاضرات ولا بيتعبوا دماغهم فى أى حاجة ولو سألتهم عن أى حاجة فى المنهج ولا هيعرفوا أصلاً الدكتور أسمه أيه.

متعهدين الرحلات

دول بيبقوا مجموعة شباب وبنات ولا فى دماغها أى دراسة غير انهم يجمعوا  فرق من الشباب ويطلعوا رحلات بأسعار مخفضة.

دول  بيحبوا الترفيه والتنزه أوى،  طول ما انت ماشى هيوقفوك ويقولولك هناخد من وقت حضرتك 5 دقايق  والغريبة انك هتلاقى نفسك موافق تطلع معاهم رحلة إزاى؟ معرفش.

المتعصبين

المتعصبين دول بقا كتير هتقابلهم فى كل حتة فى الجامعة، المتعصبين فى الدين وفى الرياضة هتلاقيهم دايما فى تجمعات، بيحبوا يوصولوا أفكارهم بين أصحابهم ونصيحة أبعد عنهم عشان  متوجعش دماغك.

الفنانين

دول بقا شوية شباب عاملين فيها فنانين صاعدين ومعاهم كمنجة أو عود ونازلين غنا على طول  مش فارقة معاهم غير  الشهرة والنجومية ولا بتفرق معاهم المحاضرات.